【遊戲新聞】拳頭社射擊新作 《VALORANT》實機影片展示技能大戰

拳頭社(Riot Games)上年對外公佈新遊戲企劃《Project A》,不過一直都甚少相關內容公佈。日前官方正式出咗條實機遊玩影片,除咗正式展示遊玩方式等情報外,仲將遊戲正式定名為《VALORANT》,以及宣佈預計於今年暑假見街!

 

 

《VALORANT》係一款第一身 FPS 遊戲,基本對戰為 5 vs 5。遊戲槍械分為主武器手及副武器,主武器槍械種類分別有衝鋒槍(2款)、霰彈槍(2款)、突擊步槍(4款)、狙擊槍(2款)以及重機槍(2款)。而近戰攻擊就類似《CS:GO》咁,要拔刀仔出黎攻擊,未玩過該系列嘅玩家可能要習慣下。

 

開戰前要買裝,呢樣野明顯向《CS》取經

另外每位角色身上有護甲,有輕甲重甲二種選擇,未知係咪同槍械間有相剋關係

 

現時版本已知有八位人物選擇,每位角色都有獨特嘅技能,喺影片中所見角色技能嘅強度都幾誇張下,掉火球、地板凍結、風陣等等都有,感覺上比起槍法更注重技能施放嘅時機以及準繩度。當然影片所展示嘅只係現階段內部測試版本,到最後見街時可能又會再調整。

 

弓箭似係索敵技能

凍結地板,阻止敵人前進

 

又由於本作係主打競技,所以官網亦有清楚列明本作最低嘅系統需求要維持於 30 FPS,推薦使用可維持於 60 – 144 FPS 嘅機種。另外亦會設置全球數據中心,承諾各地嘅玩家都可以享受少於 35 Ping 嘅對戰,並且會積極打擊電腦射擊遊戲最大嘅敵人 – 外掛。

 

 

《VALORANT》預計於今年暑假推出,雖然官網並未列明發售地區,但由全球數據中心以及官網嘅對應語言黎睇,將會同步全球推出,並且有繁體中文。

五木

動漫電玩宅,極愛金田一系列,擅長動作及策略遊戲

追蹤

更多文章