【遊戲新聞】以一雞之力挑戰喪屍 《LAST CHICK》騎呢玩法用母雞生蛋殺敵

近幾年遊戲廠商出啲遊戲真係越黎越有創意,打喪屍大家應該唔會陌生,但係如果叫你用隻「母雞」去打又點睇,唔係擬人化果種,係平時大家見開果種。獨立遊戲團隊 KIMIDORI SOFT 日前就宣布,即將推出廉價遊戲系列第二隻作品《Last Chick》,用極具創意嘅方式打喪屍!

 

 

《Last Chick》(LAST CHICK – 最後のひよこ)採用第三身視點,屬生存動作冒險遊戲。玩家身處一個全人類都變晒做喪屍嘅世界,而玩家則操控一隻「母雞」一邊抵抗喪屍一邊拯救自己嘅小雞。作為一隻雞玩家並無任何嘅槍炮近戰武器,可依賴嘅武器就係「生蛋」(明明啲蛋喺後面屙出黎,但係會向前射……)。喺介紹影片中見到生出黎嘅蛋都似乎有二種屬性,一種係普通打擊判定嘅蛋,另一種係會爆炸嘅蛋,玩家需要利用呢二種蛋去擊倒來襲嘅喪屍,並且找尋並帶領班雞仔去終點脫出。

 

 

除咗上述嘅「逃脫模式」之外,仲有要喺指定時間中搵出所有失散雞仔嘅「救出模式」,仲有要喺指定時間內保護飢餓雞仔嘅「防衛模式」。三種模式都有各自嘅網上積分排名,可以同人鬥做「最強的雞」。

 

 

《Last Chick》預計於 3 月 20 日發售,對應平台為 PC Steam,價格大約 HKD $18。

 

五木

動漫電玩宅,極愛金田一系列,擅長動作及策略遊戲

追蹤

更多文章