【遊戲新聞】治癒系歷險遊戲《Hazel Sky》超唯美解謎系幻想奇譚

 

巴西獨立遊戲工作室 Coffee Addict Studio 即在開發幻想風格精品冒險遊戲《Hazel Sky》,混合解謎與探險於一身,預計 2020 年中上架,對應平台為 Steam、PS4、XBox One 以及 Switch。

《Hazel Sky》嘅男主角係一名想要成為「工程師」嘅少年,但係呢個「工程師」同我地一般認知嘅身份,有少少唔同;對於男主角黎講,成為「工程師」係佢嘅命運,而要達成呢個目標,就要經過試鍊。

 

 

試鍊唔係讀書考試,而係流放到荒島上面,喺島上搵到各樣素材,去修理好一部爛嘅飛機,先允許佢飛返家鄉。理念上好簡單,但係遊戲又點會淨係叫你行行企企執石仔,隨住遊戲推進,你會發現荒島上面滿滿都是謎題,例如有廢船,船入面又有骷髏,仲有一啲失落文明嘅遺跡;似乎,島上處處都是故事。

 

 

玩家可以利用繩索穿梭到唔同區域,亦可以平行探索島上各處;除左收集維修飛行機嘅素材,你仲會搵到好多意想不到嘅故事碎片。

 

 

雖然係單機遊戲,不過玩家於遊戲中會有其他同伴,就係同你一樣面對緊「工程師」試鍊嘅朋友,佢地會以無線電同你交換資訊,仲會互相鼓勵,可以話係非常溫馨嘅設定。

至於遊戲名為《Hazel Sky》,想當然爾,「天空」嘅景色以及變化亦係遊戲嘅重點之一,或者係想玩家可以感受大自然嘅宏大;而天空嘅畫面造得非常美麗,玩久了想必會有心曠神怡嘅治癒作用。

遊戲預計 2020 年中上架,對應平台為 Steam、PS4、XBox One 以及 Switch。

 

 

 

神婆

神婆 真身為非典型占卜師,唔神秘,無形象,為咗兩隻貓嘅生活努力奮鬥。日系遊戲及 JRPG 專攻,重度聲優控。

追蹤

Facebook 更多文章