【玩物花絮】小飛俠70週年 LEGO Ideas入選者再挑戰 40cm LEGO阿童木

細細個睇漫畫嘅時候佢就叫「杜比」，大個近年睇就個個叫佢「阿童木」。唔經唔覺，2021 年就係手塚治虫筆下嘅《小飛俠阿童木 (鉄腕アトム)》70大壽，雖然官方仲未有啲咩相關嘅慶祝活動公佈，但 LEGO 界已經有人出手，想喺佢大壽之時搞件大禮比手塚治虫嘅 Fans。

Astro Boy (鉄腕アトム) by Ivan Guerrero aka bulldoozer21

仲記得同大家介紹過同一製作人 Ivan 嘅 芝麻街 123 Sesame Street ，喺 LEGO Ideas 2019 首輪票選後，唔好以為佢今次只係食住《小飛俠》70 週年個勢而搞呢隻 40cm 高嘅 LEGO 阿童木，佢其實細細個都係睇《小飛俠》大，就連佢返工個袋都仲用緊《小飛俠》，呢下真係冇得唔信佢真愛(笑)。

雖然個面相仲有修正嘅空間，但全身有 19 組關節，可動性同 Action Figure 有返咁上下，而且 5 隻手指都可以獨立活動。LEGO 阿童木唔只可以更換表情、武裝，全身喺製作嘅時候亦預備可拆卸部份，等玩家睇到佢身體內部嘅零件，而且心藏位置仲用埋燈件，去令大家記得阿童木有一個比人類更善良更懂得包容嘅「心」，所以唔係 Fans 又點會有呢份心意。