【遊戲新聞】《鬼滅之刃》二大作品影片發表 表現甚佳值得期待

早排我地曾經報導人氣作品《鬼滅之刃》即將遊戲化嘅消息,不過當時只係得個官網同埋簡單嘅介紹,實際點玩同埋畫面質素等等都係得個估字。日前 Aniplex 就做咗一個長達 48 小時嘅直播節目,當中就發表咗《鬼滅の刃 血風剣戟ロワイアル》、《鬼滅の刃 血風剣戟ロワイアル》二款作品嘅預告片同截圖,睇完成個心定晒。

 

 

手機遊戲《鬼滅の刃 血風剣戟ロワイヤル》係一隻非對稱生存動作遊戲,玩家可以選擇做「鬼」又或者「鬼殺隊」陣營,至於係邊個獵殺邊個就真係講唔埋啦。基本玩法同《Dead by Daylight》、《第五人格》類似,由影片中見到作為「鬼殺隊」嘅一方(即係炭仔善逸等等)有晒劍型等攻擊手段,擺脫以往同類遊戲大多只有逃跑躲藏一途玩法,相信會好吸引。

 

 

本作由 Quatro A 負責製作(曾製作《東方キャノンボール》),並由 Soleil 協力開發(由原 Team Ninja 岡本好古創立),ANIPLEX 則負責企劃及發行。遊戲預計會於今年上市,同時對應 iOS 及 Android 平台。

 

PS4 遊戲《鬼滅の刃 ヒノカミ血風譚》由 CyberConnect2 進行開發,使用UE4引擎,畫面採用動畫風格,類型為對戰動作遊戲。一如之前所料,本作似乎有向其他遊戲參考,影片中就見到有《Naruto to Boruto: Shinobi Striker》同《龍珠Z:卡卡洛特》嘅影子。而遊戲主線劇情都係講炭仔遭遇滅門慘案之後成為鬼殺隊嘅過程,影片中就展示咗打「手鬼」一段。又因為官方預計下年先出,所以估計最後 Boss 會打埋無慘,當然詳細情報都係要等官方之後再公佈。

 

 

另外喺開發影片中見到製作團隊描繪角色動作,現階段睇都還原得幾足,特別係出劍技時嘅動作做得頗精細,相信成品都唔會差得去邊,值得期待。

 

 

五木

五木 動漫電玩宅,極愛金田一系列,擅長動作及策略遊戲

追蹤

更多文章