香港人有句說話「只要有創意，我愛蔡一智」。受到武漢肺炎嘅影響，世界各地都大幅減少活動，希望大家乖乖地留喺屋企減低受感染嘅風險。喺咁嘅情況下，唔單只商業活動受影響，就連比較有教學性嘅活動，例如參觀博物館等等相關嘢都取消晒。不過最近外國就有一班水族館員工，用《動物森友會》黎做線上虛擬導覽團，成功闖出新道路！

呢班水族館員工係黎自美國蒙特雷灣水族館（Monterey Bay Aquarium），開館時更成為美國最大嘅水族館。現時因為疫情關係，該館現時處於關閉狀態。但係呢班員工聰明地用大熱遊戲《集合啦！動物森友會》中嘅博物館，再喺 Twitch 度進行虛擬導覽會，為觀眾們逐一講解各種化石、魚類、昆蟲相關知識。

最有趣嘅係水族館媒體負責人 Emily Simpson 同內容企劃 Patrick Webster 喺接受訪問時，有講到《動森》博物館收藏品入面囊括埋恐龍、遠古魚類、海洋爬蟲等等相對冷門嘅物種。而且當玩家將遊戲中出現嘅魚類、昆蟲捐比博物館後，佢地亦唔會離開自己生態，可見製作團隊非常用心並且對各種生物非常理解，令人驚嘆。

有興趣想參加呢個線上虛擬導覽團嘅朋友，可以 Follow 蒙特雷灣水族館嘅 Twitch Channel，佢地好快就會有下次線上直播導覽活動，特別係有小朋友嘅家長，話晒可以借呢個機會令小朋友增長知識同埋練習下聽英文嘛。