【讀者投稿】極高評價 Valve 新體驗《Half Life:Alyx》超班 VR 遊戲強力推介

 

《Half Life:Alyx》-Another Valve Experience

文長,涉及劇透,總結在最尾,想睇評分可直接跳到最後。

自從《Half Life 2 Episode 2》之後,事隔 13 年,Valve 終於都推出到另一隻《Half Life》既遊戲。即使唔係續作,即使係 VR 獨佔,仍然為遊戲界帶來好大既迴響。

多年前既《Portal 2》被譽為一個體驗,而唔單純係遊戲,係因為整個設定、故事同玩法環環相扣令佢超越一般遊戲講故事既高度,成為一種體驗。(《Portal》其實係同《Half Life》同一個世界觀,只係內容上《Portal》黑色幽默比較多。)

 

 

細心一諗,其實自從《Half Life》開始,每隻 Valve 既遊戲都嘗試著打破現有遊戲既界限,無論係故事式 FPS,有物理引擎以及連帶而來既解謎,定還是係獨一無二既合作打喪屍體驗……其實與其話 Valve 係 Game 廠,我覺得叫佢做一個製造體驗既地方比較合適。

《Half Life: Alyx》今次又去唔去到呢個標準?唔只得,直頭係超哂班!

 

 

今次我必須要由遊戲內同遊戲外兩個角度去評論呢隻遊戲。

係遊戲內,今集既 HL 並唔係好似外界懷疑既咁只係 Valve Index 既一隻 Demo,或者係同絕大部份既 VR 遊戲一樣,只係一種技術展示。PCVR 已經推出多年,頭盔都出左 N 咁多代,但係遊戲軟件既發展就停滯不前,去到 2019 年先叫有一兩隻真正完整既遊戲可以玩下,其中仲要分 Oculus、PSVR 獨佔等等,玩到既機會就更加細。

《Half Life: Alyx》就係少有既一隻完整既遊戲,如果你唔似我咁死得一塌糊塗,隻 Game 大概仍然需要 10-12 個鐘先可以完成(有正常探索,唔係直衝)以遊戲既內容同時長來睇,仲抵玩過之後出果隻《Resident Evil 3》重製。

 

編按:作者喺左下角,圓碌碌

 

《Alyx》講既係《Half Life 1》同《2》中間既故事,主角並唔係 Gordon Freeman,亦都冇裝甲同各式奇特既武器,只有自己同幾把執返來既普通槍,但打既同樣係外星生物大軍。

照遊戲模式睇來,我幾乎可以將佢歸類做生存恐怖遊戲,同《Resident Evil》一樣。因為《Alyx》入面子彈同補血藥物算係稀有,就算唔稀有你可以攜帶既數量亦都唔多,同《RE》 一樣要你玩 Inventory Management。

同一時間VR 亦都係度挑戰緊你射擊既精準度,打喪屍打怪要打頭打弱點或者打場景爆炸物,用盡你每一飛彈藥去渡過難關。再加上環境解謎同埋收到周圍都係既升級素材,其實真係好似玩緊《Resident Evil》或者《Dead Space》…除左遊戲係普通模式太簡單之外,當然如果玩困難既話會更加似。

 

 

而因為佢係呢個類型,《Alyx》帶出左好多呢隻 Game 整成 VR 先會出玩既獨有既優點。

各種武器既使用方式甚至係升級選項既不同都非常實在咁反映係操作之上,有真係戰鬥緊既感覺。而且將子彈收係背後而係戰鬥果陣要先退彈,攞子彈出來,入彈匣再上膛先可以開槍製造出唔少既壓力,令到成個遊戲更加真實之餘仲無啦啦緊張刺激左好多。

係我都知一早已經有 VR 既槍 GAME 係需要大家執子彈再上彈,但係好少有實際玩上來完成度咁高同失敗率咁低既上彈動作。玩家終於都唔會成日因為 BUG 而上唔到彈,對於成世人都係撳一下 R 就上彈既玩家來講,呢少少既細節真係唔知點解好感動。

 

 

咁既然要上彈,咁梗係要收集子彈。《Alyx》終於解決左VR 盤古初開已經有既問題,就係執野。

《Alyx》用 HL 背景既 Gravity 技術,整左 Gravity Glove 比玩家用。終於都唔洗周圍踎低起身執野,而且個設計師鍾意將啲道具收埋係邊度都得,因為只要玩家睇得到就可以攞得到!《Alyx》亦幾乎係唯一一隻玩家雙手真係可以同場景大部份既物品互動既 VR 遊戲,除左係戰鬥既時候開關門做掩護,或者舉起物品做盾牌之外,摷野既時候仲真係可以翻箱倒櫃,撥開障礙物等等,有一種真正「搵野」既感覺。如果《Resident Evil》既VR 遊戲都可以咁就正喇!

 

 

不過作為一隻 VR 遊戲,佢仍然有好多不能理解既位。例如可以拎起物品做盾牌,同埋乜野都可以做盾牌擋子彈,係一個非常唔同既邏輯,仲有重機槍敵人唔知點解只會係同一個地方開火,然後所有敵人都唔會避手榴彈,同埋所有訓低左既喪屍一定係死左唔會突然返生嚇你等等。

明顯係為左 VR 遊戲既難易度作出既遷就(本身已經好難掉手榴都仲要避咁永世都唔會中)但我更希望佢會有另一個處理方法可以做得更好。

 

 

跟住就到遊戲外,要講既係 Valve 對於呢隻遊戲既軟硬件支援同點樣盡量令到大家都玩到《Alyx》。PCVR 推出已經有一段時日,就算幾間大廠都出左兩三代頭盔,購買既人數都冇大幅增加。呢個當然係軟件方面既問題,而應運而生既就係《Alyx》。

Valve 的確亦都係賣緊自己既 Index VR,但同時係 Steam Support Forum 上面,Valve 既工程師仍然日以繼夜夜以繼日咁幫買左其他頭盔既玩家解決軟硬件既問題。

PCVR 唔係封閉式生態架構,而 Valve 意亦不在賣貴到無輪既 Index,相反因為《Alyx》而可以類積到更多 VR 用家既話,咁電腦遊戲同 Steam 本身,相對於主機同手機遊戲就有更大既優勢,同一時間帶動更強既電腦硬件既銷售同更多人會願意投入VR 遊戲既開發,《Alyx》可以話係電腦遊戲同 Steam 既生死存亡之作。

 

 

縱使 Index 係《Alyx》入面有獨特既功能,暫時我地都未見到有邊款主流既 VR 頭盔玩唔到。即係大家其實可以用相對上比較平既Windows Mixed Reality 頭盔玩,入場門檻就低左好多。一切一切都係因為 Valve 工程師們既努力。

《Half Life》系列由第一集開始就不停挑戰緊電腦軟硬件既極限,呢個亦係今集必須做成 VR 遊戲既原因。單單係推動整個電子遊戲產業前進呢一點,已經不得不讚。

 

 

最後,好似好少講遊戲既畫面故事音樂呢啲平時評論既野……因為 VR 遊戲既畫面同音效好大程度受你既設備所影響,所以係好難以我自己既經驗做評論。故事方面其實好短,大多數既遊戲時間玩家都係度打緊怪或者解緊謎,而 VR 遊戲又唔可以好似傳統 FPS 咁用 CG 甚至係文字同旁述個劇情,所以唔好期望太多。

主要既過程都係 Tie-in 返《Half Life》本身既劇情,而且仲要係《Half Life 2: Episode 2》之後發生,作為《Half Life》世界後續既一個小小預告而已。

 

 

值得擁有既體驗

係遊戲世界入面,好難得可以將一款作品講成一個體驗,因為體驗就好似你我既人生其中一個好重要既經歷同成就一樣,我地會為玩過呢款遊戲為榮。而 Valve 既遊戲就好多都可以咁,《Alyx》更加係最新既俵俵者。如果你已經有 VR 頭盔既,應該唔洗睇到呢度已經狗衝左去買來玩。

但如果你係未有 VR 頭盔既,你問我值唔值得買。嗱我當你本身已經有一部唔錯既打機電腦,如果唔係你都唔會對遊戲評論有興趣,咁即係你要付出既只係 VR 頭盔既價錢。

以價格比較相宜既 Windows Mixed Reality 頭盔為例,我用緊既 Samsung Odyssey+ 都只係賣緊三千頭,不過如果你想活動空間可以準確啲定位同埋手部動作可以追蹤得更準確既,都係要買返有基站既VR 套裝,價錢就會比較貴。

用來玩一隻Game 值唔值?其他地方我都答唔到你,不過香港就親眼睇住好多人 5、6 千蚊買一套 Switch+《動物之森》,咁我諗呢個一定唔成問題啦!

 

 

你應該為一個體驗踏入一個新世界

睇到 Valve 終於為左 VR 呢個領域推出一隻認真爭氣既遊戲,除左推坑之外我仲可以講咩呢?希望 Valve 再接再厲,無論係咪 VR 限定都好,都可以幫《Half Life》呢個宇宙開發更多新既體驗。

最終評分︰95

 

 

 

VJGamer 歡迎讀者投稿 – 如蒙投稿,請將文稿、筆名、作者簡介及聯絡電話,電郵至 vjgamer[email protected]

 

Peter The Gamer

Peter The Gamer 人生如遊戲,我就係PETER,玩既係人生,唔會有個更好既名。 有時寫下評論,多數介紹下GAME。分享、批判遊戲。

追蹤

Facebook 更多文章