【遊戲新聞】極恐怖四打新作 《The Outlast Trials》「超痛」手術宣傳片登場

舊年年尾發表嘅知名恐怖系列《Outlast》(絕命精神病院)新作《The Outlast Trials》一直都無乜聲氣,不過喺日前嘅「PC Gameing Show 2020」入面,就有最新消息並公開最新宣傳片。今次遊戲時間點將會回到冷戰時期,到底又要點逃命,令人期待。

 

 

呢條宣傳片一開始就喺手術室入面,一班醫生正在準備幫一位綁喺凳上嘅人做手術。呢個所謂嘅手術,其實只係強制將夜視鏡用電鑽「安裝」喺頭上。「安裝」完成之後,再被放置於類似廢棄醫院嘅地方玩逃生 Play。根據之前公佈嘅遊戲設定,今集係冷戰時期,Murkoff Corporation 招募一班不知情人士,再逼迫佢地進行各種恐怖實驗,睇返今次條片,又真係 Match。

 

 

喺宣傳片入面,其實仲透露咗一個資訊,今集玩家因手術「強化」關係自帶夜視鏡,相信唔洗好似二集《Outlast》咁要定時換電先睇到野(無電都無得「除」個鏡落黎,乜都睇唔到點玩?)。加上今集最多支援四位玩家 Co-op,有咁嘅設計好大機會係因為想大家專注於「逃命」。

 

 

《The Outlast Trials》已確定於 2021 年推出,雖然仲未公佈對應平台,不過根據往績估計 PC 版就一定有,PS4 /5、Xbox One、Xbox Sereis X 都應該走唔甩,至於 NS 就似乎要等下啦。

 

 

五木

五木 動漫電玩宅,極愛金田一系列,擅長動作及策略遊戲

追蹤

更多文章