由 KONAMI 發行、於PlayStation 年代備受好評嘅 JRPG 系列《幻想水滸傳》開發團隊再次集結，宣佈推出以同樣班底製作嘅全新 JRPG《百英雄伝（Eiyuden Chronicle）》，預計 2022 年於 PC 平台首發；同時會展開 Kickstarter 集資計劃，希望將作品登錄到其他家用機平台。

《幻想水滸傳》可以話係 KONAMI 旗下最出色嘅遊戲系列之一，不過，自從 2012 年於 PSP 平台推出《幻想水滸伝 紡がれし百年の時》之後，系列作就一直沉寂，雖然偶爾會傳出「作品會重製」等流言，不過一直只屬花邊新聞。

今次嘅《百英雄傳》由村山吉隆、河野純子、小牟田修、村上純一等人合作開發。《幻想水滸傳》「親生老竇」村山負責劇本故事、河野負責人物設計、小牟田負責程式系統設計、以及村上負責美術指導與製作人，四位皆為《幻想水滸傳》年代活躍嘅遊戲業界人士，相信今次嘅作品有一定嘅信心保證。

四人同時設立全新工作室「Rabbit & Bear Studios株式会社」及工作室去製作《百英雄傳》，所以《百英雄傳》係唔關 KONAMI 事的。

《百英雄傳》繼承《幻想水滸傳》嘅精神，主角將會踏上旅程去尋找性格各具特色嘅 100 位同伴，亦會於遊戲裡面加入強化己方兵力嘅城寨育成要素。不過，遊戲並無以 3D 作為賣點，反而反樸歸真，以點陣風格設計。當然，JRPG 最重要嘅元素係劇本以及系統，例如數年前大獲好評嘅 Square Enix 作品《Octopath Traveler》一樣係以點陣風格登場，一樣可以做到畫面炫麗。

《百英雄傳》目前只確切對應 PC 平台，工作室預計將於香港時間 7 月 28 日 12 時正開始～ 8 月 28 日進行 KickStarter 集資，連結＜在這裡＞。假如你想喺 PC 以外平台玩到《百英雄傳》，記得留意住遊戲嘅新消息喇！