【遊戲新聞】四人喪屍射擊遊戲免費更新 《World War Z》新職業跨平台連線

四打喪屍遊戲咁多年黎都係由《Left 4 Dead》雄霸市場,直到舊年由 Saber Interactive 開發嘅《World War Z》推出後,大受歡迎並且令唔少玩家「轉會」。遊戲上市啱啱一週年,官方就正式追加「Dronemaster」免費更新,以及多機種跨平台連線,係時候叫人一齊玩返啦。

 

 

改編自同名電影遊戲《World War Z》,係一款喪屍生存射擊遊戲,採用第三身視點,最大支援四位玩家線上連線。玩家喺遊戲中要對數以百計喪屍,同時尋找逃生路線離開呢個地方。今次更新將追加全新職業「Dronemaster」(無人機大師),玩家可以操控無人機發動攻擊喪屍;強化防禦能力保護隊友;甚至可以用自殺式攻擊衝向敵陣,一次過炸死大量喪屍為逃生路上打開缺口。

 

 

除咗新職之外,仲增加新稀有武器「ACW-20」,以及新增各種武器自定選項。另外最重要嘅當然就係跨平台連線,今次更新後,PS4、Xbox One 及 PC 平台玩家均可以使用跨平台連線功能,可以同其他機種朋友一齊打喪屍,爽!

 

 

《World War Z》已經推出,對應平台為 PS4 / Xbox One 及 PC(Epic Games Store)。另外有關今次更新詳情, 請看官方公告

 

五木

五木 動漫電玩宅,極愛金田一系列,擅長動作及策略遊戲

追蹤

更多文章