【遊戲試玩】Ubisoft 版薩爾達 《芬尼克斯傳說》走出自己風格的爽快作品

任天堂嘅《薩爾達傳說曠野之息》推出後,不但震驚玩家,更令唔少廠商得到啟發。當然,啟發呢樣野有程度之分,當作品出現太多雷同,同時無添加新元素的話自然會被指為抄襲(最知名例子《神x之塔)。喺遊戲界歷史「啟發」呢樣野時有發生,大家熟悉嘅類惡魔城、類魂系遊戲就係常見嘅例子,當中又有《仁王》參考自《Dark Souls》並成功創出自己風格嘅成功案例。

日前我地進行媒體優先試玩《芬尼克斯傳說》,明顯有好多元素出自《曠野之息》,但製作團隊添加各種元素,並且針對戰鬥系統作重點強化,令整個遊玩過程都非常之爽快。(遊戲尚在開發階段,最後版本可能會與試玩版有所不同)

 

 

《芬尼克斯傳說》係一款動作角色扮演遊戲,採用第三身視點,開放世界。今次試玩嘅部份分為二部份,一部份係體驗前期主線故事及拿取各種神器,另一部份係挑戰地區強大魔物。

遊戲背景採用希臘神話,玩家扮演有翼半神芬尼克斯,為咗拯救希臘眾神挺身對抗怪物之起源「堤豐」。開場時芬尼克斯同行軍隊遇難死淨佢一個,喺路上慢慢發現自己嘅使命並四處收集神器。整個歷險過程由普羅米修斯向宙斯用講故仔嘅方式敘述,因為用搞笑嘅方式演譯,賦予遊戲輕鬆愉快嘅色彩。

 

旁白由普羅米修斯同宙斯二個人負責,對白幾搞笑有趣

怪物造型顛覆固有型象,例如蛇髮女妖喺呢隻遊戲入面係一隻核突肥仔,噴火仲要喺個鼻儲氣再射出黎,勁有公園阿伯放「飛行道具」味道

 

因為係開放世界,所以遊戲一開始已經可以周圍行,但因為媒體試玩流程關係,所以我地都係跟主線劇情收集晒所有神器先開始旅程。玩家會依次序先得到武器阿基里斯之劍、奧德修斯之弓、海克力斯護腕以及達洛斯翅膀,過程中會逐步教你基本戰鬥技巧及遊戲機制。

 

海克力斯護腕同《曠野之息》磁石雷同,可以舉起或牽引重物,可用作解謎或打怪

達洛斯翅膀就等同《曠野之息》滑翔傘

可以馴服野外生物騎乘,據了解現時有 5 – 6 種生物可供馴服

 

喺《芬尼克斯傳說》入面,分為多個區域,每個區域都擁有該區希臘神特質。要開啟該區地圖就要好似《刺客教條》咁,攀爬之高處俯瞰同時標記附近可供探索寶庫或解謎地區,唔洗好似《曠野之息》咁搵餐死。遊戲提供極之大量嘅謎題,寶庫就類似《曠野之息》嘅神殿,係以前往終點為目標嘅大型解謎關卡。另外大地圖周圍都有各種解謎要素,好似係收集小七弦琴旋律再解開大七弦琴樂譜咁,種類繁多而且有返咁上下難度。

 

解謎之外仲有唔少小遊戲玩,圖中係競速小遊戲

《芬尼克斯傳說》同樣有物理效果,例如射箭穿過火會變成火箭、打爆巨石會變成細石、用斧頭劈樹再推倒等等

 

講完週邊野就到戲肉講重點強化嘅戰鬥系統啦,基本動作係輕、重攻擊、四個神威技能、閃避、跳躍同埋盾反。遊戲基本連招非常自由,基本上亂撳都有野連到出黎,如果配合埋技能的話,可以由地面連一大堆招再炒佢上天玩 Air Combo 再轟返落地,而且喺空中同樣可以用閃避,又可以用索拉自己過去連招,整體感覺甚有《DMC》味,極為爽快。

 

連技非常自由

食蘑菇無 CD 時間,手速夠快的話等同無限氣

 

雖然可以瘋狂連招,但就絕對唔代表你可以開無雙,因為每隻怪物都有自己嘅硬值量。面對小型怪物可以無難度瘋狂劈,但面對配備盾牌嘅小型怪、中型以上怪物都會有若干招式有「霸體」,亂劈的話就肯定會食招。面對呢種敵人就要累積佢地嘅「暈眩值」,使用重武器或部份招式皆能累積「暈眩值」,打爆之後無論係咩級數嘅強敵都會瞓低任砌。

 

打爆「暈眩值」之後會瞓低俾你任砌

 

同《曠野之息》,可以用多種方式攻略強敵,例如用巨石投擲(類積大量暈眩值)、放箭射弱點、引佢去樹林卡位等等,不過講到最爽嘅都係「盾反」。喺《芬尼克斯傳說》入面,絕大部份攻擊都可以「盾反」,近戰攻擊盾反後會令敵人出現大硬值,遠距離攻擊則原招奉還反彈返去,但如果敵人招式出現紅光就只能閃避。面對巨型強敵好多時都要靠盾反製做空位攻擊,不過當中會夾雜住紅光+超大傷害招式,喺「盾反>攻擊」呢個過程中一次炒粉就隨時 GG,非常刺激!(最尾有 Boss Fight 片)

 

學技後盾反會製造強大衝擊波,極爽!

技能類似簡單版《刺客教條》嘅天賦樹系統

解謎或者擊敗敵人後有機會得到武器裝備或者 Skin

 

總結:

《芬尼克斯傳說》喺多個地方都見到《曠野之息》影子,但製作團隊加入多種元素配搭搞笑風格,成功做出一隻有 Ubisoft 特色嘅作品,係衰在人物造型大過「美式」,亞洲玩家可能唔係咁啱口味,好在極爽快嘅戰鬥系統加返唔少分。今次試玩過程愉快,美中不足嘅係野外怪物數量比較少,不過有可能係試玩部份處於早期較「安全」嘅地區,所以先會有呢個情況。

 

個人覺得提豐造型好鬼死似《Ring fit》入面隻「墮拉攻」

 

整體黎講《芬尼克斯傳說》絕對係一隻有趣爽快嘅作品,12 月 3 號推出,對應平台為 PS5 & 4 / Xbox Series X/S & One / Nintendo Switch / PC Epic Store & Uplay,值得一試。

 

編輯部評分:8.5/10

 

森麻

Avatar VJGamer總編,細細個已經蒲機舖,機齡甚深,熱愛電玩文化。

追蹤

Facebook 更多文章