日前 VJGamer 受邀出席「PlayStation®5 媒體試玩活動」，搶先一睹 PS5 實機以及試玩部份新作。現場有全球首度提供試玩嘅新作《Sackboy A Big Adventure》、《巴蘭的異想奇境》，仲有 Sony 引以為傲嘅《Astro’s Playroom》。呢款遊戲係 PS5 內建嘅活動遊戲，主要作用係俾玩家感受全新手制 DualSense 嘅各種質感，令玩家更有次世代感覺。

試玩時，拎起 DualSense 第一個感覺係「又重咗」，比起現時 PS4 DualShock 4 更「墜手」，不過重得有原因的，後面會講解。喺開始遊玩《Astro’s Playroom》前會有個小小嘅手制 Demo，主要係講解今次手制有咩咁特別，簡單講就係手制各部份都會有震動區，利用比起以往更細致嘅震動力，配合遊戲營造各種「質感」。例如喺水上漂浮會有輕輕嘅波浪式震動、沙灘上被強風迎面吹來會感受到沙粒打喺面上嘅感覺等等，絕對唔會輸比 Switch 嘅「HD 震動」，可惜 Demo 版未有提供更多遊戲，未能測試有無《Mario 奧德賽》咁強，但差距絕對不大。

作為 PS5 力推嘅新世代手制，唔係齋強化震動功能咁簡單。DualSense 嘅 L2 同 R2 按鍵分別有二個獨立嘅震動器，進行開槍呢類動作會感受到模擬後座力嘅震動（相信呢個就係令手制更重嘅原因）。另外呢二個按鍵加入阻力設計，鍵程按到一半左右會逐漸加強阻力，用意係模擬拉弓動作。就個人黎講，如果係玩《Horizon Forbidden West》呢類遊戲絕對係爽嘅，但玩槍 Game 時就會因為阻力問題令開槍時間減慢，有利有弊。

今次 Sony 明顯喺手制下咗唔少功夫，但鑑於之前嘅經驗，多數都係前期部份獨佔作品會用到手制新功能（PS4 六軸感應同觸控版已經係例子），希望今次各大廠商會盡量試用新功能，特別係思考 L2 R2 嘅用法，相信成件事會更「次世代」。