NAMCO 分店越開越多，之前 9 月就喺九龍灣開第九間分店，因為位置極方便嘅關係（隔黎就係 Food Court），相信有唔少朋友都去過。呢間分店同其他店最主要嘅分別，就係有一個以「運動」為主題嘅場地「SPORTAINMENT ARENA」，10 月 15 號先開張，入面各種運動遊戲極之歡樂兼且價錢優惠，非常推薦帶埋朋友過去借機「郁」佢！

「SPORTAINMENT ARENA」總共有九個遊戲，各有特色。不過正式開始前都有小小注意事項，首先係記得著襪，因為有唔少遊戲都要除鞋玩，赤腳就唔係幾好啦。另外多個遊戲都需要大量運動，忌食得太飽去玩。仲有一樣就係記得帶埋朋友去玩，因為基本上絕大部份遊戲都係多人同樂，單拖嘅話樂趣肯定減半。最後提提大家，雖然唔少遊戲都需要有工作人員在場先玩得，但後面如果無人排隊的話係可以任玩的，勁爽！

JUMBO BOWLING

進場時大家會接觸到嘅第一個遊戲。玩法係將巨型保齡球向前推，每推跌一個樽就會得到一分，如果推跌特定樽令佢地變成特別排列更可一次過得到高分。巨型保齡球重量適中，就算女仔都拎得起，不過要推跌啲樽就有啲技巧，唔係死用蠻力就得。

女仔一樣輕鬆拎起

VS HANDBALL

喺第一個遊戲旁邊，玩法係將手球投擇至屏幕上嘅目標，考眼力同準繩度，整體算係易玩嘅。

輕鬆易玩嘅遊戲，適合親子同樂

RUN&RUN

二人對戰遊戲。工作人員會先幫玩者綁上腰帶，背後連住一條有大橡筋，然後二邊跑道嘅玩者就要衝前將波仔貼上旁邊嘅計分表，越遠越高分，時限一分鐘。我地玩果陣因為大家都已經將二個波仔貼到最遠，所以淨低嘅時間就係拎走人地個波貼返去起點，非常過癮，極推薦遊戲之一！

極好玩兼玩到喘氣嘅遊戲（高階玩法：搶人個波）

POKA POKA STADIUM

二人對戰遊戲。二位玩者各企喺圓形軟墊上，然後爭奪長條狀軟墊或者推人落地，無落地又或者奪得長條狀軟墊者勝。因為落地就輸嘅關係，所以唔一定要鬥力，例如人地用力扯果陣你咪放手囉…….極考平衡力同策略！

鬥陰濕！

SHOCKBALL

二人對戰遊戲。二位玩者各企喺非常細小嘅圓柱上，再推動中間巨型圓球推隊手落地，又因為場內滿佈大型海棉方塊，跌落去完全唔痛。不過因為周圍都係海棉所以發唔到力，要爬返上去條圓柱係勁攰嘅，所以出盡力攻擊你朋友再睇佢爬返上黎啦！

極耗體力嘅遊戲，因為跌咗落去之後勁難上返碌柱

場內滿佈大型海棉方塊，跌落去完全唔痛。（飛撲後落都無事）

Basket 4

位於大圓球後面，可以多人對戰。玩者分為藍隊或紅隊，最快將四個同色籃球連成橫、直、斜線就贏，簡單過癮。

VS PINGPONG

二至四人遊玩嘅兵乓波遊戲，不過可以揀嘅球拍就比較特別，有中空波板、特細波板等等，兵乓波都有大波、細波揀，另外波枱上會投射各種圖案擾亂你嘅感覺，屬於比較簡單嘅遊戲。

VS ARCHERY

可單人或二人對戰。揀選弓之後瞄準螢幕射箭靶，高分者勝。箭頭有海棉包住，絕無危險性。遊戲進入第二回合開始會有風速影響，系統會計算命中位置及風速影響，最後畫面先會顯示玩者得到幾分，簡單又好玩。

MASSAGE FOOTBALL

簡單射龍門遊戲，不過發球者同龍門都要企喺石春墊上面玩，真正痛到飛起，我地玩咗 1 Round 就頂唔順了，證明我地係成班廢柴勁唔健康。

堅係痛到飛起

「SPORTAINMENT ARENA」已經開幕，位於九龍灣德福廣場 2 期 5 樓 501A 舖（Food Court 隔黎），營業時間 11:00 – 21:00，收費頭 30 分鐘 $80，學生 $60，小童 $50，之後每 30 分鐘 $60（成人）/ $50（學生） / $ 40（小童），場內九個遊戲無限次數任玩，詳情請到官網查詢。