【遊戲新聞】對應動態 4K 及極快讀碟時間《Biohazard Village》將會善用 PS5 手掣震動機能

 

即將於 2021 年推出市面嘅《Biohazard Village(又名 Biohazard 8)》早前於 PlayStation Blog 上面有新消息公佈。呢隻同時會於 Xbox Series X|S、PS5 及 PC 平台推出嘅次世代恐怖遊戲,就 PS5 最新機能而有更詳細介紹。

 

 

PS5 DualSense 手掣特別強調震動功能,所以工作室表示,將會盡力切合該功能而令玩家對遊戲有更深刻體驗;而使用槍擊嘅部份,亦會充份應用手掣強化嘅 Trigger 按鍵功能,令玩家更能感受槍嘅回彈力以及阻力等等體感體驗。同時,遊戲會對應兩部主機嘅光影追蹤功能,塑造更逼真畫面。

 

 

畫面方面,遊戲支援動態 4K,同時支援 PS5 內置 Tempest 3D 音效功能,不過呢度要注意返玩家自己所用嘅耳機係咪能夠對應。工作室同時強調遊戲 Loading Time 將會極為快速。

《Biohazard Village》故事發生喺《生化 7》嘅數年後,七代主角 Ethan 與妻子 Mia 團聚並生活於雪山之上,不過平穩日子好快就被打斷,因為雪山之上潛藏住另一樣恐怖事物。

 

 

與《Biohazard 7》唔同嘅係,今集唔再係主力於困搏嘅大宅裡面進行遊戲,舞台擴闊到一整條嘅廢村當中。今集 Chris 依然會登場,似乎係為了幫助 Ethan 而來;而宣傳片段中可以見到 Chris 最後槍擊了一位貌似 Mia 的女子,相信《Bio 8》依然會係一個耐人尋味的故事。

工作室表示會盡力充份使用 Xbox Series X|S 以及 PS5 嘅機能黎開發「次世代感受嘅恐怖遊戲」,期待遊戲日後會有更多消息公佈,到時再與大家報導。

 

 

 

神婆

遊戲雜食向,FPS 苦手,全種類 RPG 專攻,重度聲優控。使用機種:Xbox Series X|PS5|Nintendo Switch|Steam Deck。

追蹤

Facebook 更多文章