【遊戲新聞】XSX 出煙影片疑似造假 網友出片解開真相

新世代主機 Xbox Series X|S 早幾日正式推出,之前訂咗機嘅朋友相信都享受緊,但係琴日有外國玩家就喺 Twitter PO 咗條片,內容係 Xbox Series X 冒出大量白煙。一眾索粉見到呢條片自然如獲至寶,網上亦出現大量 Memes 圖。但係好快就有網友質疑影片真實性,因為只要用一個簡單嘅方法就可以製作 Xbox Series X 出煙效果。

 

 

最早出片話 XSX 識出煙嘅分別黎自 Arek Adamowicz 同 NICKBLanco_ 兩位玩家,出片之後好快就有人討論今次新主機係咪散熱有問題,話晒初代 Xbox 360 曾經有過熱三紅往績(不過我哋編輯部實測運行超過八小時都只係微暖)。不過經過網友細心觀察,發現影片中出現嘅煙都係白色的,同燒硬件出現嘅黑煙唔同,而且煙係向上飄,如果係燒硬件的話應該係多角度冒煙先至係。

 

 

雖然有網路柯南分析影片疑似做假,但事主唔出黎解畫大家都係得個估字。搞笑地隔咗無幾耐,就有另一位網友喺貼條片出黎,教大家點樣重現出煙效果。方法極之簡單,就係趁 XSX 個風扇仲郁緊果陣,吹電子煙啲煙落 XSX 個底,然後主機就會將啲煙喺頂度抽返出黎。Xbox 官方 Twitter 都有回覆,就話無法相信大家竟然會將電子煙啲煙噴落部機度,請大家唔好咁做咁話,不過呢句說話點睇都係笑緊人出片做假。

老實講我地編輯部有四部 XSX,就算玩《Assassin’s Creed Valhalla》都只係微暖,唔係好信有過熱問題出現。不過軟件部份仍然有唔少問題,例如有時開 Game 會開唔到、Quick Resume 功能未完善等等,希望微軟唔好掛住笑人,努力搞掂自己啲野先。

 

五木

動漫電玩宅,極愛金田一系列,擅長動作及策略遊戲

追蹤

更多文章