【遊戲新聞】成部街機搬返屋企 「NEO GEO MVS X」17吋家用街機內置 50 款遊戲

唔少機迷都有同一個夢想,就係擺部街機喺屋企。之前 SNK 就出過迷你版 Neo Geo Mini,但係對機迷黎講都係唔過癮,如果你都係咁諗嘅,機會黎啦。今個月尾 SNK 將會推出擁有 17″ 屏幕嘅木製街機 NeoGeo MVSX,仲內置 50 款遊戲兼且價錢相宜,買黎做聖誕禮物俾自己簡直一流!

 

 

SNK 今次推出嘅街機 NeoGeo MVSX 使用 17″ 屏幕,行 1280 x 1024。機身大小有接近 65cm 高,仲可以額外追加增高底座變成近 1.5m 高,望落感覺已經同正常 Size 街機非常接近。搖杆同按鍵則採用美式(即係一碌粗身棍、按鍵中間位微凹),同大家用開嘅三禾桿、制有所分別,需要注意。另外主機運行速度非常快,Load Game 接近即時讀取,遊玩時亦唔覺有 Delay,喇叭亦都好夠聲,極有街機味。

 

搖杆同按鍵則採用美式,同大家用開嘅三禾桿、制有所分別

機頂位置係一個真嘅燈箱,大家可以 DIY 塊燈片更換

機身比起正常街機略小,但係雙打都夠位,唔會太逼

 

NeoGeo MVSX 內置 50 款遊戲,包括《King of Fighter》系列(94 – 2003)、《King of Fighter》系列(94 – 2003)、《Metal Slug》系列(初代 – X)、《侍魂》系列(初代 – 5 Special)、《餓狼傳說》系列(初代 – Mark of the Wolves)、《World Heroes》系列(初代 – Perfect)、《龍虎之拳》系列(初代 & 3)、《戰國傳承》系列(初代 – 3)、《月華之劍士》系列(初代 & 2)、《風雲 Tag Battle》、《Shock Troopers》以及等等。

 

 

主機最特別嘅地方係可以喺 MVS 街機及 AES 家用系統上自由切換,亦即係話絕大部份格鬥遊戲有得開返「Training Mode」練招。另外玩家可自行開啟模擬映像管掃描線效果,重現原始畫面。NeoGeo MVSX 支援英文、日文等 10 種語言。

 

轉為家用機版本就有得開返「Training Mode」練招

有得 Set 制,可以跟返香港慣用上三下一

 

NeoGeo MVSX 官網定價 USD $449.99,原本預定 11 月出街,不過最近因為小問題而 Delay,詳情可向香港代理 BLAZEPRO 查詢。

 

以下為試玩片段,請自行無視我哋嘅廢話。

 

森麻

VJGamer總編,細細個已經蒲機舖,機齡甚深,熱愛電玩文化。

追蹤

Facebook 更多文章