【讀者投稿】《Watch Dogs: Legion》實現到一半既偉大計畫

文長,涉及劇透,總結在最尾,想睇評分可直接跳到最後。

Watch Dogs Legion 吸收左第一同第二集既累積經驗,同一時間加入左招募成個地圖既NPC 既突破性玩法。本來應該可以係眾多既開放世界遊戲之中脫穎而出,但最後只係流於一個未完成既夢想,真係令人非常感慨。以下一齊來睇睇個原因。

 

 

1. 幻想中的Cyberpunk X Deus Ex 風格

Watch Dogs Legion 繼之前兩集之後顯示出越來越多的Deus Ex 意味。首先整個英國既背景由前作既連接城市、監控城市變成一個真正Cyberpunk 社會。社會上既所有經濟命脈,乃至治安、民生全部都由跨國超大企業操控。因此資訊爆炸既城市反而言論自由越來越窄,貧富懸殊越來越深,再加上新移民同產業轉移等等令失業情況進一步惡化。社會每處都充斥住流民同永不止息既示威、衝突,造就更多傳統同新型既犯罪組織崛起、壯大,整個文明既充滿進步,又懸於崩潰既邊緣。

 

 

係呢種衝突之中,好難唔令聯想起另一個大作系列Deus Ex。尤其係Watch Dogs系列發展至今,由以往單人hack,去到用機械人,用無人機甚至係警衞身上既鏡頭來做視角puzzle 等等。再溝埋Ubisoft 係Farcry, Assassin’s creed等等類sandbox 遊戲度借返來既DNA,Watch Dogs Legion 玩起上來竟然非常似Deus Ex 系列!

玩家可以透過學習唔同既技能令到自己可以遙控敵人既炮塔同埋無人機,進行無情既轟炸。蜘蛛仔機械人亦都可以隱形或者跳得更高,去到更多地方有更多駭入既選擇。

但就係呢度,問題就出現喇!

 

2. 主角係無人機同機械人

當然啦,我個人主張成隻game 故事上既主角其實係AI Bagley, 而佢亦都恰如其份咁幽默得來又充滿智慧。但遊玩上既主角好明顯就係各種既無人機同埋機械人。

 

 

因為放蜘蛛機械人同佔領無人機既能力係所有隊員共用,而有左呢兩樣野之後已經可以過到非主線既所有關同主線既大部份關卡。如果你有耐性去搵啲機械人可以運用既位,咁九成九時間你都唔洗入去衝突既區域。

咁我想問你有咁多種唔同既隊友係拎來做乜?

無論係主線定支線定果一大堆無聊重覆任務,如果玩家唔係特登搞事既話幾乎唔會比車追,又唔洗殺人,又唔洗打交,又唔洗潛行 (因為連入去都唔洗,蜘蛛搞掂)咁求其街邊路人都得啦,點解要有咁多唔同能力既隊友?唔通唔係為左隻Game 係玩法上會有根本性既分別咩?

 

 

而又,即使玩家選擇強行突入,但係就連武器既升級同埋傷害減少呢啲技能都係共通既,最後大家只會揀返同一樣既泛用武器去打突擊,根本上都冇分別。

呢個就係Watch Dogs: Legion 最大既敗筆。

 

3. 最理想既偉大計劃

其實Watch Dogs: Legion 內藏住一個係人都睇得出既偉大計劃,而且係參考過其他作品,而人地係真係做到,並唔係唔可以實現既計劃,而只係Ubisoft 既執行能力有限先搞到咁。

呢集WD 最明顯既其中一個特色就係每個招募返來既成員都有自己既特殊能力,而如果你夠薑開永久死亡模式既話,你仲會隨時失去佢地。本質上佢就係一隻Roguelike 遊戲,你要係特定既地方招募你需要既某個成員,去做你想做既目標。遊戲本身都有提示你,要招一個建築工人來用貨運無人機,要招一個Albion 既守衞來潛入被封鎖既重地等等。而如果佢地死左呢?你就要重新再招募過,就好似Roguelike 遊戲死左要Rerun 一樣。

但真係去到遊戲入面呢?所有要用貨運Drones 解既謎題一定會有個地方比你召喚出來,根本就唔需要用果個人。每一個人都係鬼咁好打,根本就唔一定要招好打既特務或者殺手去做突擊任,成隻Game 亂哂大龍!

如果所有隊員既被動能力變得更加獨特,武器由固定能力變成種類專精,技能樹再分成共通同埋職業專精。例如反控制人無人機一定要無人機專家先做得,步槍一樣要特務、軍人或者殺手先攞得,武器同裝備變成專精可以促使玩家用比較旱有既殺手或者特務果陣可以用錢買更加精良既軍備同保護衣,無人機專家可以用錢訂製更強更多功能既無人機或者蜘蛛機械炮台,而大力勇士既角色就有專門為佢地而設既障礙物同埋後面既資源寶藏或者隱藏通道等等。任務可以更加多元化,令唔同種類既隊員都有發揮空間,咁呢個偉大計劃就已經行前左一大步。

而家所有既隊員之間係完全冇分工合作既可能性,亦都導致招人既時候冇一個明確既目標。你永遠都唔會知邊一個任務係要親身上陣,所以要搵定重火力既隊友。你永遠都唔知邊一個任務要開車逃走,所以要搵定車手或者善於甩身既隊友,例如街頭藝人等等。最最後你都只係會單拖咁用泛用型角色爆左機就算,而永遠唔會知某個隊友幾時有用。

 

 

「Peter 你係咪玩野呀?隻Game 又點會同你講埋跟住要用咩人,幫你爆埋機好唔好?」我知道實會有人咁講。

所以我地又返到去WD 參考過既其他作品身上,WD 今集既多角色團隊,其實有少少借鏡左GTAV。GTAV 幾個主角既分工非常明顯,一個開車一個開飛機一個戰鬥加潛行,但重要任務果陣可以同一時間合作,當然打劫果陣仲可以招人但只係暫時。

 

 

最重要既係WD 既所有任務幾乎都係Dedsec 自己自發,去偷人地既數據或者破壞人地既Server。只有極少極少任務係比壞人攻擊之後先反擊,即係話所有野都係Dedsec 先手。

咁點解AI Bagley 唔係做GTAV 打劫任務既統籌角色?Dedsec 既任務全部都係走入去一個高設防地方偷野,咁同GTAV 既打劫本質上有咩分別?

Bagley 基本上可以負責係觀察地型之後,開展一個計劃,例如進入既入口,守衞既分布,目標既位置等等。呢啲資訊玩家到場之後HACK CAM 一樣可以睇哂,邏輯上來講叫AI HACK 完之後話我知唔係有效率好多咩?

到有哂資訊,就可以比玩家指派唔同既角色去做唔同既崗位。根據玩家招募到既角色,分別安排做潛入、打手、偷鎖匙、用無人機干擾/殺敵,最後車手係逃出既門口安排好特製既車逃離現場。而唔夠既人腳就要求玩家去開放世界度招人,咁先有動力有目標去集齊啲角色職業架嘛!而且咁樣做所有角色都可以有佢既用處。

我都知好多時我對遊戲作出既建議都係鳩UP,但今次真係有人做過,而只係Ubisoft 懶而冇做到自己本來就想做既野,咁就變成一個好大既缺點。

其餘既缺點例如畫面同遊戲細節比較差呢啲就唔多講,同埋成隻Game 既支線質素明顯比其他Ubisoft 既遊戲低劣,最緊要係一個輕鬆鳩來笑下既任務都冇,每個支線既背景都好認真,唔係錢就報仇,連一丁點既創意都冇,真係講多都無謂。喂求其抽下水整個支線係有人委托Dedsec 去hack 一間叫CD Project Blue 既遊戲公司,因為佢地成日都唔出game 都好丫,起碼有得笑下。

全隻game 我覺得最大既優點就係坐車果陣既電台音樂。可能係因為啱Feel,可以只係我個人覺得啱聽,但每次上車都好有驚喜,un 住咁去到目的地,呢個已經係我最大既慰藉。

 

隻Game 應該未整完,不如下次整好先出。

綜合以上所講,呢隻Game 只係名義上整完,但實際上同玩家應得,甚至乎係Ubisoft 應有既願景都仲差一大截。(如果Ubisoft 本身既願景只係達到呢個程度,咁我就真係恭喜你,因為食得屎) 絕對唔可以話係一隻好好既作品,加上本來就已經好多既BUG 仲非常影響遊戲體驗 (當然會PATCH 既所以唔屌住),評分真係唔會太高。

Watch Dogs: Legion 最終評分︰67

 

VJGamer 歡迎讀者投稿 – 如蒙投稿,請將文稿、筆名、作者簡介及聯絡電話,電郵至 [email protected]

 

Peter The Gamer

人生如遊戲,我就係PETER,玩既係人生,唔會有個更好既名。 有時寫下評論,多數介紹下GAME。分享、批判遊戲。

追蹤

Facebook 更多文章