【玩物評測】一流設計的二流產品 LEGO年的故事 開箱簡評

LEGO 中國節日主題產品 呢個產品系列,今年已經出到第三年。上年嘅廟會舞獅嗰種濃厚嘅節日感覺下,今年 80106 Story of Nian 年的故事睇落又繽紛又有教育意味,而且新嘅組件又多色又多款,但實際我認定佢係暫時呢個系列產品最低評價嘅一件,點解?睇落你咪知囉!

 

80106 Story of Nian – 1067 件 – USD $79.99 (香港售價 $559)

豬、鼠之後,今年到牛牛啦

總共 8 個部份,而最後兩部份就主力製作「年獸」

大門上嘅「左右門神」就係 80106 唯一嘅貼紙,設計上選用常見嘅秦瓊、敬德像做藍本。

「樂在其中慶新春」、「高朋滿座迎佳節」、「辭舊迎新」呢三件印件會唔會吸引到你買?

人仔

80106 喺人仔方面,大家著眼點定必集中於隻牛人身上。而另外幾隻造型設計,將時裝同節日服裝融合,相比過往嘅設計更貼近生活。

留意,得一個小朋友有”WOW”嘅表情,其他全部都係開開心心嘅樣

相比之下,舊年隻鼠人好似得意可愛啲

呢件「年獸裝」係咪型先

終於唔洗逢親老人家,都要整套唐裝衫佢著

場景

 

80106 Story of Nian 場景以北方大宅院大門藍本,結構同拼砌方式冇乜新意,就算用左唔少新組件拼合而成,雪景、煙花、配件都只係點綴,冇能力補償佢零玩樂性沉悶單調呢兩個嚴重問題。加上同上年廟會舞獅嘅設計太多相似嘅地方,令人購入嘅意慾好低。

唔係完全一樣,但作為消費者,我上年買左兩件睇落外觀差唔多嘅產品,今年仲會唔會想買呢?

清空呢個景就咁睇,拎嚟扮古裝武俠劇場景,可能仲好發揮。

呢兩張門神選用用貼紙去表達,係最佳嘅處理方法。

顏多配塔非常出色

融雪效果做得相當仔細兼簡單

場景右邊嘅小黃花,應該係代表迎春花吧。

煙花嘅設計就係咁簡單

配件中最得意同有新鮮感,就只係兩棵菜…..

 

年獸

 

 

80106 話晒叫 Story of Nian 「年的故事」,年獸個尺寸比例做得好好,就算說明書有一版紙去大概交待個故事,但外觀設計同配色似隻《芒亨》轟龍多過怪獸,加埋啲 Minifigure 嘅表情睇落似見到吉祥物多過食人怪獸。同個場景又有種格格不入嘅感覺,

砌到一半,係咪有啲似轟龍先?!

平心而論,年獸個頭係做得仔細嘅,而且又多新顏色件配搭,啱晒 MOC 人士入手

頸部啲鬃毛嘅砌法,蹤橫交錯去製造層次同立體感。

學官方嗰種擺法,係咪有啲古古怪怪,好似慶祝緊隻「年獸」嚟到?

總結

 

80106 Story of Nian 年的故事最大嘅死罪係文化差異。要做個好歡欣嘅感覺但搵左個唔太適合嘅題目,整隻年獸勁可愛,個個笑口噬噬好似等隻年獸嚟開 Party 咁。但係說明書入面,又會畫埋漫畫故事講年獸出嚟「害」人。而呢個矛盾要解決嘅方法好簡單,只要每個 Minifigure 印多個「驚訝」表情落去就完全妥當,而且 6 隻人仔有 3 隻得單表情,官方淨嗰 3 隻補個驚青樣落去都冇咁離題啊。依家每部份都做得幾靚幾好都冇用,只會更突顯呢件產品設計上只著重技巧忽略主題細節

好老實講,80蚊美金成 6 舊水港紙去買呢盒 80106 我就真係唔多捨得,香港售價平近百元嘅情況下就交返比玩家自己衡量。有 廟會舞獅 珠玉在前,80106 都係留返比新入坑玩家、死忠或者送禮用可能更合適。

80106 Story of Nian 年的故事, 2021 年 1 月 3 日正式發售。

 

 

80106 Story of Nian 年的故事

  • 發售地點:LEGO Certified Store
  • 地址:
    • – Langham Place L12 Shop 01B
    • – Times Square Shop 902-3C
    • – New Town Plaza Shop 416
    • – Cityplaza Shop 012
    • – Tuen Mun Town Plaza Shop 2217

 

阿九

阿九 打機 - 識少少;玩具 - 識少少;睇戲 - 識少少;動漫 - 識少少..... 買膠、派膠、分享膠!Only The Best Is Good Enough! Lego Enthusiast https://goo.gl/HRnxDW

追蹤

更多文章