以往我地每年都會由編輯部揀出「十大最佳遊戲」或者「十大最伏遊戲」，不過今年就轉個玩法，由編輯部揀出「十大滄海遺珠遊戲」，即係被嚴重低估又或者忽略嘅作品，等大家回顧返過去一年有咩值得一試嘅遊戲，立即 GOGOGO！
Mortal Shell
遊戲充滿住濃烈嘅《Dark Souls》味，同時又加入創新元素，製作出一隻有別具風格嘅類魂遊戲，但難度又比起魂系遊戲低，非常適合魂系新手入坑。可惜嘅係遊戲後期敵人攻擊模式相對單調，場景變化少，估計係後期資金洗得七七八八原因所致，但仍然係一隻出色嘅獨立遊戲，值得一試。
詳細評測文章：【遊戲評測】類魂遊戲新嘗試 《Mortal Shell》創作新元素同時保留魂味
Desperado 3
遊戲類別係現時少見嘅「即時戰術遊戲」（RTT），亦即係名作《Commandos》果類野，以實時方式喺模擬戰場環境入面，對人物或部隊進行戰術指揮，並無需採集資源、無需起野，只需要專注於兵種/角色運用及戰術運用。遊戲系列以美國西部為主題，但巧妙地以系列起源做故事背景，就算無玩過之前幾集亦都完全無問題。
遊戲基本玩係於每一關大型場景中，利用各成員特點去潛入、躲藏又或者擊殺對方敵人，同時避免被人發現，只要到達目的地或完成任務就會過關。因應敵人各式各樣特性，玩家可以用聲東擊西、正面突破、潛行暗殺、刻意露出破綻等手段，即使係同一關卡但會有 N 種手段突破，正正係呢隻遊戲嘅魅力所在，屬編輯部擊力推薦。
詳細評測文章：【遊戲評測】極優秀即時戰術遊戲 《Desperado 3》值得拎「最佳遊戲」
Mad Rat Dead
今年十月尾推出，將音樂節奏遊戲同動作遊戲混合，變成一款音樂節奏橫向動作遊戲。遊戲玩法要玩家喺限時之內越過障礙都達終點，但操控方式就非常特別。玩家喺遊戲中無論做咩動作都要跟返音樂個「Beat」，節奏錯的話就撳乜都會無反應，而且節奏會隨音樂轉變速度，真心幾難玩。
另外音樂搵到一班有名音樂人負責，整體歌曲都頗有水準，自問鍾意玩音樂遊戲同動作遊戲嘅朋友要試下。
詳細評測文章：【遊戲評測】毒性猛烈令人上癮 《Mad Rat Dead》音樂 x 動作遊戲完美融合
Ghostrunner 幽影行者
喺 PC 版得到唔少玩家關注，但去家用機絕少人提及嘅微妙作品。係一款採用 Cyberpunk 風格，以第一身視角遊玩嘅高速動作遊戲。遊戲以極快嘅節奏飛簷走璧，手持武士刀斬殺敵人，玩法既簡單又純粹。
特別之處係本作無論你斬人定係敵人開槍打你都係「一擊必死」，加上敵人槍法又快又準，好多時點死都唔知。所以玩家不但要 Keep 住高速移動，仲要預估埋敵人射角作出閃避，配合各種忍者能將敵人一刀兩斷（真係會將敵人劈開），可以話係集爽快與 Hardcore 於一身，對第一身動作遊戲有興趣嘅朋友值得留意。
Yes, Your Grace
表面上係一隻王國經營遊戲，實際上係一隻角色扮演遊戲。玩家所扮演嘅國王每日主要工作就係喺皇宮謁見各種人物，聽取各種意見及情報，從中分析情報嘅真偽以及作出相應嘅決策，每個決策都會對國力產生影響，輕則令文眾不滿重則令令王國覆滅，另外仲要兼顧外交以及戰爭等情況。管治國家之餘，身為一個父親亦都不能忽略家中成員，培育女兒以及訂立姻親對象都有國家未來嘅考量，完美呈現出作為國王及父親嘅艱辛。
比較可惜嘅係遊戲最終走向單一，變化不大。但以一隻獨立製作小品遊戲黎講，本作水準優異，加上 Xbox Game Pass 可免費遊玩，不妨一試。
VISAGE
由獨立遊戲工作室 SadSquare Studio 受到小島秀夫《P.T.》啟發，開發嘅第一人稱心靈恐怖遊戲《Visage（面容）》，可以話係今年最出色嘅恐怖遊戲之一。遊戲有劇情有內容，並唔係一味靠嚇，好多時係利用玩家嘅好奇心，去製做更多嘅驚嚇感覺，例如某啲地方，你行入去第一次係咩都無，第二次入去可能就會出事或者有新野發生。
作為一隻「解謎脫出」遊戲，由四個篇章組成嘅《VISAGE》其實背後係一個悲劇，劇情好吸引的，但喺知道劇情之前先要比人嚇一大餐先……目前對應 Steam、PS4、Xbox One｜Series X｜S 平台，同埋 Xbox Game Pass 有，鍾意恐怖 Game 嘅朋友請一定要試下。
Tell Me Why
遊戲由曾經製作《Life Is Strange》系列嘅法國工作室 Dontnod Entertainment 開發，係一隻互動型選項遊戲，故事圍繞一對孖生姐妹，劇本包含單親家庭、精神家暴、跨性別、同性戀等等元素，故事裡面亦無一個絕對嘅壞人，只係會見證到人類自私以及各種醜惡嘅面孔。今年同類型作品裡面黎講，係一隻頗出色嘅作品。
對應平台為 Xbox 以及 Steam（有落 Xbox Game Pass）。
詳細評測文章：【遊戲介紹】弒母真相與各懷私心的居民《Tell Me Why》互動選項經歷極人性化故事
黑相集：稀望鎮
由 Supermassive Games 開發，係《黑相集》系列第二彈作品。遊戲類似《Until Dawn》（同一開發團隊），係一款互動式電影遊戲。玩家將分別操控五位主角，體驗三個階段嘅劇情，到最後揭開被困於稀望鎮嘅真相。
遊戲中三個階段分別代表主角群嘅「前世」，每個階段嘅選擇都會影響角色生死以及結局，由於劇本係取材自真實事件「Salem Witch Trials」，整體劇情同氣氛真都幾唔錯。特別係約埋一班朋友，一人扮演一位角色，真係可以玩足一日。
NO STRAIGHT ROADS 曲途
由《Final Fantasy XV》首席設計師 Wan Hazmer 以及《Street Fighter 5》插畫師 Daim Dziauddin 創辦嘅馬來西亞遊戲公司 Metronomik 製作。今年咁多作品中，《NO STRAIGHT ROADS》（曲途）將聲音、畫面、遊戲、藝術四個元素玩得最出色嘅作品。
遊戲主線以搖滾音樂對坑主流同大財團壟斷為題，故事簡潔完整，仲要借遊戲諷刺現實音樂市場，聽開歌嘅朋友定必會心微笑。角色設計、遊戲操控與音樂節奏之間嘅配搭，想搵啲新鮮感刺激下嘅玩家們，絕對可以喺 PS4 同 Xbox One 上一試。(NS版就唔好啦)
Journey to the Savage Planet
2020 年年初就已經發售，我會稱佢為一隻「騎尼惡搞版 No Man’s Sky」。《Journey to the Savage Planet》講述玩家被公司派到 ARY-26 呢個蠻荒星球探索並評估人類喺當地發展嘅可能性，不幸地降落時發生意外，被逼流落喺外星之中，公司就講明你要靠自己能力飛返地球，否則就自生自滅啦。
遊戲門檻低，謎題設計都花左唔少心思，不過最精彩嘅係故事序述部份。黑心老細、嘴賤 AI 助理加埋啲無厘頭輔助資訊，就算只係睇人玩都覺得過癮。PS4、Xbox One、NS 同 PC 都有，Xbox Game Pass 仲可以免費遊玩，你冇理由唔玩掛？
除咗以上十款遊戲，今年其實仲有《天穗之咲稻姬》、《小魔女諾貝塔》等高質野，有心搵的話仲有《The Touryst》呢類小品野，遊玩性絕對唔會輸比大廠作品。當然，黎緊一年我哋仍然會為大家介紹各種有趣得意好玩嘅作品，記得多多支持阿！