【遊戲新聞】用VR親身落場冧友 《Hitman 3》全關卡可使用 PSVR 親手殺敵

今個月萬眾期待嘅光頭殺手《Hitman 3》日前就公開 PSVR 實機遊玩影片,喺今集玩家可以用 PSVR 親身落場,用更直接嘅方式去親自冧友。根據官方嘅資訊,今次仲直接支援晒所有關卡,有別於以往同一款遊戲 VR 版本變成「閹割版」得幾關嘅現象。

 

 

 

《Hitman 3》係一款潛行動作冒險遊戲,一般模式下會採用第三身視點。玩家將扮演 47 號殺手延續上集劇情,而今次會去到杜拜再次展開任務。官方早前公開咗 PSVR 實機遊玩影片,喺片中所見玩家將會轉變為第一身視點,所有暗殺行動、潛行等動作變得更入臨場感,不過就未知如何操作,如果又係用返 PS Move 的話,細緻動作未必可以好好地呈現。

另外根據官方資料,PSVR 不但支援《Hitman 3》,更可以將前兩代嘅關卡讀取,即係總數有超過 20 關可供遊玩,亦即係話差唔多要拎返隻 PSVR 出黎抹塵啦!

 

 

《Hitman 3》將於 1 月 21 日推出,對應平台為 Xbox Series X|S / Xbox One / PS5 / PS4 & PSVR /   PC(Epic Games Store)/ Nintendo Switch / Stadia。

 

五木

五木 動漫電玩宅,極愛金田一系列,擅長動作及策略遊戲

追蹤

更多文章