【遊戲新聞】Ubisoft 版星球大戰開發中 由《全境封鎖》團隊製作開放世界遊戲

《星球大戰》(Star Wars)遊戲系列不嬲都係由 EA 整開,不過今日一單消息就打破呢個現況。Lucasfilm Games 宣佈將會聯同 Ubisoft 旗下工作室,聯手製作一款以劇情導向嘅《星球大戰》開放世界遊戲,正式打破 EA 獨佔《星球大戰》遊戲系列局面。

 

 

Ubisoft CEO Yves Guillemot 接受訪問時表示「龐大的《星球大戰》傳奇故事為我們團隊帶來源源不絕的靈感。這是我們與 Disney 和 Lucasfilm Games 長期合作的開始,我們很高興能與他們攜手合作,以 Lucasfilm 令人稱奇的智財為基礎,創造出一款我們認為《星球大戰》粉絲會喜歡的遊戲。」(原文傳送門

不過現時遊戲就未有具體資訊,淨係知道會係一款原創並以劇情導向嘅開放世界遊戲,採用 Snowdrop 引擎,由 Ubisoft Massive 《全境封鎖》團隊負責製作。

 

《全境封鎖 2》

至於早於 2013 已經簽咗合約嘅 EA 喺 Ubisoft 公佈消息之後,亦都迅速出咗條 Tweet 表明佢地嘅開發團隊目前正計畫製作多款全新作品,特別係上年推出嘅《Star Wars Jedi: Fallen Order》取得大成功,已經重拾玩家嘅信心,對 EA 黎講確實非常鼓舞。回望返 Ubisoft 公佈嘅內容,提及到「與 Disney 和 Lucasfilm Games 長期合作」,有可能係暗示多過一款遊戲,所以黎緊嘅日子可能會同時玩到由二間公司製作嘅同類型《星球大戰》遊戲。

 

 

Lucasfilm Games 早前亦都宣佈《奪寶奇兵》(Indiana Jones)會由《德軍總部》製作團隊 MachineGames 聯同 Bethesda 開發同名遊戲系列作品,由於 Bethesda 已被微軟收購,好大機會遊戲推出後就會直接落 Game Pass。

五木

五木 動漫電玩宅,極愛金田一系列,擅長動作及策略遊戲

追蹤

更多文章