早兩日微軟宣佈 Xbox 線上月費服務「Xbox Live Gold」將會加價，而且一年制價格加幅高達一倍，自然令到用戶炎上。不過微軟對應速度甚高，喺極短時間內就正式宣佈撤回加價決定兼改善免費服務內容，唔似得啲死撐自己無做錯，死都唔肯聽民意嘅垃圾管治階級。

日前微軟宣佈即將調整 Xbox 線上月費服務「Xbox Live Gold」價格，本身一年價格為 USD $59.99，調整後將變更為 USD $59.99  6 個月，等同加價一倍。消息公佈後大量玩家炎上，然後微軟喺不足半日時間就宣佈撤回呢個決定。

「Xbox Live Gold」其實就類似 PSN Plus 月費服務，要使用連線服務（例如線上對戰、Party 等等）就必需加入「Xbox Live Gold」，另外每個月仲會送兩款遊戲，每週會有限時遊戲試玩以及會員特價（Deal with Gold）等等。「Xbox Game Pass」就係另外購買嘅遊戲庫服務，入面提供大量遊戲免費遊玩，當中不乏大作及新出遊戲。至於「Xbox Game Pass Ultimate」就係包含以上兩個服務及同時支援 Xbox 及 PC 嘅服務。

隨住 Xbox Series X|S 推出，微軟力推「Xbox Game Pass Ultimate」服務，因為現時只需最平 HKD $10 就可以由「Xbox Live Gold」升級上去。喺今次事件入面，微軟調整「Xbox Live Gold」價格好大機會係想拉近「Xbox Live Gold」同「Xbox Game Pass Ultimate」嘅價格差距，從而誘使玩家轉為使用「Xbox Game Pass Ultimate」，特別係今次反應嘅速度快成咁，好大機會本身就準備好「取消」呢個方案。

Today was not great. We always try to do our best for you and today we missed the mark.

We hear you, and we’re reversing our Xbox Live Gold pricing updates.

— Xbox (@Xbox) January 23, 2021

長遠黎睇，微軟明顯係想將大多數用戶轉移至「Xbox Game Pass Ultimate」，改變玩家習慣之後就可以調整「Xbox Game Pass Ultimate」價格，特別係我地早前向香港微軟查詢時，佢地亦有明言「Xbox Game Pass Ultimate」$10 優惠遲早會完，短期內亦會取消 Microsoft Online Store 一年會員制購買選項。不過今次玩家社群嘅反應就令微軟知道短期內有大動作勢必引致炎上，現時佢哋亦承諾未來幾個月將會改善免費服務，玩家唔需要有「Xbox Live Gold」就可以玩到 Xbox 上面嘅免費遊戲，而大部份玩家對微軟嘅回應感到滿意。

相關回帶文章：

【遊戲新聞】十蚊 Game Pass 快將絕跡？ 微軟回覆：係一場美麗的誤會

【編輯部專題】微軟真正殺著並唔係機價 係三年唔洗錢買遊戲呢招