【遊戲新聞】聲稱受《P.T.》啟發的恐怖 PC 遊戲《Evil Inside》今月將登錄 PS4|5

 

小島離開 KONAMI 前於 2014 年推出的最後作品《P.T.》一直被視為《Silent Hill》系列嘅延伸|續作嘅「試水溫」作品,雖然只係短短一個 Demo,而且已經從 PlayStation Store 下架;不過,其「沙盒式」不斷變化嘅恐怖迴廊體驗,至今仍然為唔少玩家津津樂道,同時亦為遊戲直播主熱愛嘅直播項目。

 

 

及後有唔少恐怖作品都從《P.T.》中獲得靈感,例如《Layers of Fears》、《Visage》等等;當中亦包括近日打正旗號講明自己係受《P.T.》啟發嘅恐怖遊戲《Evil Inside》。《Evil Inside》由 Jandu Soft 開發,於 2021 年 3 月 5 日登錄 PC 平台,而 PlayStation 近日亦宣佈遊戲會於 3 月 25 日登錄到 PS4|5 平台上面。

 

 

於 PS 近日公佈嘅宣佈影片中可見,玩家將身處於一家兩層樓高嘅大屋裡面,而偶爾亦會見到女鬼|怨靈嘅身影於屋中閃現。不過,日前 PC 版本就公開試玩版供玩家下載,唔少玩家玩完反應都未算太正面,例如有人認為《Evil Inside》只係失敗嘅模仿作品,只學到《P.T.》包裝,但學唔到神髓;亦有玩家指出操作以及畫面生硬,未能製作恐怖氣氛。

Demo 試玩片段:

 

 

目前遊戲於 Steam 平台評價為「褒貶不一」,不過 Demo 實際上試到嘅部份並唔算多,探索亦唔算深入。PlayStation 將《Evil Inside》視為今個月嘅重點作品以及「PS5 上面首隻恐怖遊戲」作為賣點推出,又是否能夠從玩家身上獲得良好評價?有待遊戲正式發售日後再為研究。

 

 

《Evil Inside》於 2021 年 3 月 5 日於 PC 平台上推出;3 月 25 日於 PS4|5 平台上面推出。

 

 

神婆

神婆 正職為塔羅占卜師,唔神秘,無形象,為咗兩隻貓嘅生活努力奮鬥。日系遊戲及 RPG 專攻,重度聲優控。

追蹤

Facebook 更多文章