【遊戲攻略】解鎖二三艘潛艇教學 《Monster Hunter Rise》刷國王獨角仙悶到瞓著

早兩日我哋嘅一篇小知識技巧篇入面有提到要盡快解鎖收集道具必備嘅潛水艇,雖然做村任好快就會有第一隻潛水艇,但係要解鎖第二第三隻果陣就要做任務,而且仲幾煩下,所以我哋整多篇簡單收集教學,希望幫到大家。(為咗方便尋找,建議玩家先將地圖設定至顯示相關物品,設定方法可參考小知識篇)

 

 

第二隻潛水艇解鎖任務

村任去到三星後出現「以特產品進行異文化交流」支線任務,任務要求玩家交付「三個狐火鬼燈」及「三個船艇牡蠣」。狐火鬼燈位於「大社遺跡」地圖,圖標為特產品內嘅「紅色的搖曳果實」,機率性獲得。船艇牡蠣位於「寒冷群島」地圖, 圖標為特產品內嘅「牡蠣群生地」,多數位於地圖深藍色養殖場內,要用翔蟲或跳躍到達,同樣為機率性獲得。

 

 

 

第三隻潛水艇解鎖任務

村任去到六星後出現「 以特產品來活絡交易」支線任務,任務要求玩家交付「一隻國王獨角仙」、「三朵岩石玫瑰」及「三個鉍光石」。國王獨角仙位於「水沒林」地圖,圖標為特產品內嘅「閃耀獨角仙」,低機率性獲得。建議先帶備大炸桶,由營地出發後直衝右下角金字塔,利用大翔蟲飛至金字塔頂再用大炸桶打開入口拿取第一隻閃耀獨角仙,然後往金字塔右手邊拿取第二隻,轉到 7 區利用翔蟲前往貓雕像上方大平台拿取第三隻。之後過 11 區拿第四隻,然後直接衝去對面小神廟拿第五隻,走一圈之後第一隻就差不多重生,個人經驗係跑咗五圈先刷到國王獨角仙,真係悶到瞓著。

 

建議採集路線

感覺上 7 區命中率高少少

 

岩石玫瑰位於「沙原」地圖,圖標為特產品內嘅「沙漠玫瑰」,機率性獲得。雖然 9 區 10 區都標示有沙漠玫瑰,但係初始狀態下無法獲得,所以都係乖乖地齋刷營地對出個點比較穩陣。鉍光石位於「熔岩洞」地圖, 圖標為特產品內嘅「虹色礦石」,高機率獲得,同樣多數要用翔蟲或跳躍到達,建議靠近地圖左邊行會比較易搵。

 

 

其他相關回帶文章:

【遊戲攻略】操龍系統詳細解說 《Monster Hunter Rise》必學進階技巧做操龍大師

【遊戲攻略】六分鐘激賺十八萬 《Monster Hunter Rise》快速賺錢法變富翁其實唔難

【遊戲攻略】新手獵人小知識技巧 《Monster Hunter Rise》教你地圖長期顯示道具等設定

 

 

滅盡殺手

重度魔物獵人中毒者,歷代遊玩時間破億分鐘!

追蹤

更多文章