【遊戲新聞】PS5 獨佔無限輪迴難度作品《Returnal 死亡回歸》工作室表示會考慮加入手動儲存選項

 

PS5 獨佔遊戲《Returnal 死亡回歸》於 2021 年 4 月 30 日正式推出,呢隻由芬蘭遊戲工作室 Housemarque 製作嘅第三視點 Roguelite 射擊遊戲,編輯部目前尚在攻略當中,遊玩感覺暫時唔錯;不過,由於遊戲每一次探索開始、去到玩家死亡為止,途中並沒有手動 Save 嘅選項,所以每次遊玩《Returnal 死亡回歸》都頗花時間。

唔少玩家同我地有一樣嘅疑問,就係「希望加入手動儲存選項」嘅要求,呢項要求於海外唔少論壇及社群裡面都成為熱門話題。工作室 Housemarque 表示,佢地原意,係想玩家以每一次死亡及重生,去感受遊戲最大嘅樂趣,以及確保 Roughlite 設定嘅平衡;佢地亦都曾經建議玩家,每次都最好確保自己有足夠時間打機,先至好玩《Returnal》咁話。

 

 

不過,作為一個都市人,唔係我地唔想坐定定專心打機,奈何生活繁忙,有時可能坐低玩一陣,呢個要去湊仔,嗰個要落街幫老婆買飯,或者老細一個急 Call 話有野要做,呢個時候,假如遊戲能夠提供一個手動 Save 然後 Quit Game 嘅選項,對於玩家黎講會輕鬆好多。工作室可以限制 Save 嘅欄位,例如每次 Save 都只能夠覆蓋上次個 Save 之類,咁就可以防止玩家不斷 Save|Load 去破壞遊戲體驗嘅行為。

 

 

Housemarque 表示工作室現正考慮如何加入最適切嘅手動儲存機能,有新消息會再為大家報導。

《Returnal 死亡回歸》於 2021 年 4 月 30 日已經推出,對應平台為 PS5 限定。

 

 

神婆

神婆 為咗兩隻貓嘅生活努力奮鬥,日系遊戲及 RPG 專攻,重度聲優控。

追蹤

Facebook 更多文章