【遊戲新聞】名越稔洋親口證實:未來《人中之龍》系列將繼續起用回合制戰鬥

 

由木村拓哉飾演男主角嘅動作遊戲《JUDGE EYES:死神的遺言(審判之眼))》於 2018 年 12 月推出,雖然當時 SEGA 講到實牙實齒話「唔打算推出續集」,不過呢一個被視為《人中之龍》系列世界觀衍生作品嘅新系列,於推出之後嘅評價算係唔錯,因此 SEGA 於 2021 年 5 月 7 日終於正式公佈《JUDGE EYES:死神的遺言》嘅續集《Lost Judgement(審判之逝:湮滅的記憶)》,暫定 2021 年 9 月 24 日全線上架,對應 Xbox One|Series X|S 及 PS4|5。

 

 

遊戲公佈當日,名越稔洋監督接受外媒 IGN 訪問時,親口承認公司目前亦著手準備緊下一集嘅《人中之龍》,有鑑於《人中之龍 7:光與闇的去向》獲得商業上面嘅成功,未來嘅《人中之龍》系列亦有意繼續起用回合制式嘅 RPG 戰鬥方針;至於近似「桐生一馬」式嘅即時動作系統,則會於《審判》系列裡面繼續延用落去。

 

 

名越監督並未透露下一集《人中之龍》是否會繼續起用「春日一番」作為主角,不過遊戲日前推出國際英文版本,遊戲獨有嘅日式幽默,亦於海外造成一定話題及反應。近年來大型遊戲公司都較傾向重視歐美市場反應, SEGA 是次嘅遊戲決定,未知是否能夠同時取悅新舊《人龍》系列 Fans 嘅需要?有遊戲相關最新消息會再為大家報導。

 

神婆

為咗兩隻貓嘅生活努力奮鬥,日系遊戲及 RPG 專攻,重度聲優控。

追蹤

Facebook 更多文章