【遊戲介紹】設計你心目中地獄 《Hell Architect》泡製折磨刑具序章免費試玩

大家對地獄呢個地方嘅印象都離不開「惡人受罪」嘅地方,但係你有無諗過負責地獄嘅人點生活,又有無諗過可以自己設計受刑嘅方式?《Hell Architect》係一款得意嘅地獄經營小品遊戲,早前有試玩版出咗,體驗下經營地獄係咩感覺。

 

 

《Hell Architect》由獨立遊戲團隊 Woodland Games 開發,係一款城市建造模擬遊戲。遊戲中玩家將扮演地獄管理員,目標係要路西法退下王位再由自己接管地獄。要管理地獄就要興建各種建築物以增加罪人人口,再利用佢哋去做苦工增加泥土、金屬、媒炭等資源。

 

 

 

有人自然就要有相應嘅設施,雖然身處地獄,但係仍然要用電要進食要屙,所以要起廁所起餐廳仲要起人力發電機。搞掂生活所需之後就要起埋各類型酷刑裝置,班罪人做完苦工之後再受刑一條龍服務,諗起都爽!

另外除咗一般罪人外,更有時會召喚到有獨特能力嘅傳奇人物,即係史上殺最多人排行榜果啲人,唔知排頭位果個有無得召喚呢?

 

 

《Hell Architect》預計於 2021 年發售,對應平台為 PC Steam。現時已推出序章免費試玩,大家不妨一試。

五木

動漫電玩宅,極愛金田一系列,擅長動作及策略遊戲

追蹤

更多文章