【試玩速評】新系統好玩兼有雙打 《Far Cry 6》難度大增劇情吸引勁現實

作為《Far Cry》系列 Fans,今次作品等足三年,自然非常期待。早前我哋獲得 Ubisoft 邀請試玩《Far Cry 6》,系統有唔少更改,上集嘅線上合作故事模式不但保留,更強化至兩人皆可保留進度,劇情更加引人入勝,絕對係十月必玩之作。

 

 

《Far Cry 6》係一款射擊動作角色扮演遊戲,採用第一身視點,開放世界,最大支援二人連線合作。今集故事發生於熱帶天堂「亞拉」,呢個地方已經鎖國 47 年,政局持續動盪不安,直到新任總統安東.卡斯迪路出現。佢手握強大嘅軍隊進行高壓獨裁統治,所有唔肯對佢唯命是從嘅人一律將佢標籤為「假亞拉人」,話佢哋唔愛國然後剷除異己。扮演主角嘅玩家就喺機緣巧合之下加入反抗游擊隊,進行推翻暴君嘅革命運動。

 

真係放喺咩地方都咁啱用

自古以來「洗腦」就係最好嘅管治手段

 

如果大家有留意日常新聞,今集故事描述嘅情況就勁似現時被塔利班所控制嘅阿富汗(同某個播毒大國亦有好多相似地方),同樣地行緊高壓恐怖統治,同樣殘殺人民剝削佢地權利,同樣對佢地進行洗腦教育,逼佢地落田做奴隸,完全係人類重複犯錯嘅寫照。特別係故事中玩家嘅同伴瘋狂派便當,當中更有一席對話,反抗軍首領明知開戰嘅結果係導致國家更混亂,但仍然堅決行出呢步,極具真實感同時令人不勝唏噓。(仲有可供賄賂嘅敵軍,真實到呢)

 

對白非常正,香港人睇特別有感覺

 

感性說話講完,講返遊戲本身。《Far Cry 6》系統上作出唔少更改,固有嘅槍械改裝、飛鼠裝保留,打獵系統並無復活,而最大改變莫過於技能系統。以往隨角色升級解鎖嘅技能天賦整個移除,變更為技能與新裝備「極品」綁定。「極品」係一副攜帶型背包裝備,有多種類型各自對應獨有能力,例如「狂怒」固有技能係快速噴射位移。技能組則變為「極品」內嘅模組,製作並安裝模組後就會得到如「加強防禦力」、「加快跑速」等技能。

 

新武裝「極品」,型到裂

各類型「極品」有自己專屬能力

舊有技能系統變為「極品」內模組,要收集物品解鎖

 

要講《Far Cry》自然唔少得潛入呢 Part,黎到今集潛行難度大增,除咗敵人警覺性明顯高咗之外,誘敵手段亦都比較「廢」。以往可以掉石仔吸引敵人前往指定地方查看,喺今集就變為掉棒球(要安裝配件先有),問題係棒球嘅吸引範圍勁細,喺整個試玩過程中只係成功過一次,其他情況都係直接被敵人發現最後變成硬打清場。如果係想玩完全潛入拎特別獎勵的話,相信會比以往集數花更多時間諗點攻略。

 

敵人警覺性明顯調高,誘敵手段變得更廢,令潛行難度大增

不過暗殺成功仍然係爽的

 

另外今集玩家係扮演游擊隊一員,要不時向主島發動奇襲攻擊,為咗令攻擊更符合現實,製作團隊特別整咗大量地下通道,利用呢啲通道進行突襲,現實感大增。至於上集因為武裝直升機過強關係,被戲稱為「直升機無雙」。今集雖然同樣有武裝直升機使用,但係每個地區都會設有防空砲台,會直接破壞敵對空中單位。所以想玩「直升機無雙」就要先去據點破壞砲塔,唔會再出現上集「一機走天涯」玩法。

 

有對空砲台情況下會形成管制領空,就算搶到直升機都好快被擊落

要玩直昇機就要先拆砲塔

 

整體黎講,今集有大量改動,對 Fans 真係非常有吸引力,特別係搞笑任務仍然存在,唔想打打殺殺嘅又可以釣下魚打下牌,後期又有得起基地。對未玩過呢個系列嘅朋友,亦都非常推薦一試,嚴肅題材加上偶然輕鬆支線任務,多變玩法耐玩性高,每集都係獨立故事,無玩過前作都無問題,加上好大機會播毒大國無得玩,唔係唔玩阿?(最後附上其中一節任務片段,有興趣嘅朋友可以睇睇)

《Far Cry 6》預計於 2021 年 10 月 7 日推出,對應平台為 Xbox Series X|S、Xbox One、PS5、PS4、PC、Google Stadia 及 Amazon Luna。

森麻

VJGamer總編,細細個已經蒲機舖,機齡甚深,熱愛電玩文化。

追蹤

Facebook 更多文章