【遊戲介紹】隨機策略塔防遊戲 《Isle of Arrows》自訂敵人行走路線版圖會不斷擴大

塔防類遊戲大家都好熟悉,今次介紹嘅《Isle of Arrows》都係一款塔防遊戲,不過加入 Roguelike 隨機要素,要自己砌敵人行走路線,版圖仲會不停擴大。有晒以上呢幾種元素後,令到本作充滿新鮮感,加上係獨立製作遊戲,值得支持。

 

 

《Isle of Arrows》Gridpop 一人獨力開發,係一款有 Roguelike 隨機要素嘅策略塔防遊戲。核心玩法同其他塔防類大同小異,都係要起各種砲塔擊殺路上嘅敵人,阻止佢哋去到終點,但係本作有趣嘅地方係所有登場敵人、獎勵、事件都係隨機生成,而且每一回合開始前玩家都要放置隨機嘅道路零件,自訂敵人行走路線,加上版圖會不斷擴大,每次遊玩都係不同嘅挑戰。

 

 

現時已知將內含戰役、挑戰及每日防禦任務三種模式、三個擁有獨特道路零件嘅主題活動、四個獨有遊戲風格嘅公會、五十多種道路零件、四十多張獎勵卡片等等,更會附設遊戲修改器,內容都頗為豐富抵玩。

 

 

《Isle of Arrows》預計於 2022 年夏季上市,對應平台為 PC Steam。

五木

動漫電玩宅,極愛金田一系列,擅長動作及策略遊戲

追蹤

更多文章