早排出咗一隻好似《Final Fight》、《格鬥三人組》咁款嘅懷舊街機平面動作遊戲《Final Vendetta》，整體玩落不過不失，但係部份設定就令人感覺莫名其妙。好在遊戲售價平，質素對得住價錢，下面簡單同大家講下自己玩後觀感。

《Final Vendetta》由 Bitmap Bureau，係一款平面動作遊戲，支援單機雙打。雖然就咁睇個名就似係以《Final Fight》為藍本，但實際玩落就更似《格鬥三人組》（Bare Knuckle）。故事都係個妹比黑幫捉咗，然後你叫埋幾個 FD 一齊殺入去救佢果類老土野，不敘。有三位角色選擇，紅衫主角平均型、大隻佬就玩一擊脫離、女仔就玩速度連技。

主要動作都係普攻、特殊技、跑、跳攻擊、擋格、超必，玩慣呢類遊戲嘅唔會感到複雜。上面講到本作同《格鬥三人組》非常相似，都係可以按向後攻擊、有特殊技連招等等，但係系統上就比較遜色，主要係無考慮玩家遊玩時嘅「爽快度」。以「後攻擊」為例，喺《格鬥三人組》入面，雖然都係可應付後方接近嘅敵人，但更多時候都係用於 Cancel 普攻，即係「普攻、普攻、普攻、 後攻擊、普攻、普攻、普攻」咁 Loop，但係本作就無法以「後攻擊」Cancel 普攻，令玩法變得較單調，加上「後攻擊」按法麻煩兼一擊倒地，令人更減低使用意慾。

喺《Final Vendetta》入面，主角同女角都係玩普攻+特殊技連招，浮空後再追加攻擊，就咁睇就幾 OK，連招果陣仲幾爽，因為問題出自於技能按法。以主角火拳連續技為例，按法係「特殊鍵+擋格鍵」（Switch 預設係 X+A）使出火拳，然後追加重擊就要 →→ + 特殊鍵，但係特殊鍵平時按係無任何動作的。即係話連招浮空後，如果按唔切 →→ 的話，齋按特殊鍵就等於企定定，唔明點解要有呢個設定。

大隻佬打 Down 人之後可以不停跳起下攻擊屈倒地敵人，問題係後面關卡要打 Down 人唔容易…

除咗特殊技要用兩個按鍵使出，解圍超必都係要按兩個鍵，而喺設定入面係不能選擇 YXBA 四個鍵以外嘅按鍵，即係整個遊玩過程要不停兩個鍵咁按，極唔就手。另外，雖然宣傳上話有四個遊戲模式，但全部都要爆機或使用特定角色爆機先會解鎖（難度絕對唔低，無得 Con 機）。最正嘅係明明每個角色都有幾招特別按法或玩法，但係訓練模式都係要你爆機之後先會解鎖，成件事完全無站在玩家角度思考，一大敗筆。

無論點 Set 都離唔開 YXBA 四個制

雖然設定上有唔少奇怪問題，但係遊戲本質上係幾有挑戰性。第二關開始所有敵人都識對空，跳入攻擊難度好高下，同時超過半數敵人識起上攻擊，無得屈起身。幸好喺本作有超必殺技槽，打中敵人就會累積，滿咗之後出解圍超必係唔扣血，加上條槽都幾易儲，善用的話降低不少難度。

難度絕對唔低，都幾考走位

總結：

整體內容不過不失，如果有得 Set 制的話評分會更高。由於選擇難易度分別只係 7 條命同 5 條命分別，加敵人 AI 強大，即使係擅長玩呢類遊戲嘅玩家都會覺得有挑戰性。比較遺憾嘅係同期撞正同類型遊戲忍者龜，比較之下的確係略為遜色，幸好價錢搭救（Steam 賣一舊水咋），仍然可以一戰。