「有貓就是讚！」相信呢個係唔少人都有同感。作為貓奴一份子，啱啱做搶先體驗嘅模擬遊戲《喵星總動員》（Catizens）就絕對不能錯過。遊戲受到《RimWorld》及《模擬市民》啟發，要照顧不同性格嘅主子，建立喵喵村落又去出去探索同時要保護自己條村，齋諗都 Happy 啦！

《喵星總動員》（Catizens）由獨立遊戲團隊 Bad Optics 開發，係一款城市經營模擬遊戲。玩家要做嘅野就係照顧各種貓貓，幫佢地建造、發展及保護村莊，以及探索島嶼其他地方。喺遊戲開始前，可以自訂貓貓嘅外觀以及個性等數值，之後更會因應數值會學識唔同範疇嘅技能，由專職農耕、打鐵生活類的，去到專係用劍、弓箭嘅戰士類別保護居民嘅都有。之後更可以自行培育啱心水嘅貓貓去其他達人貓貓度做學徒，慢慢訓練出唔同專業社群。

作為一款城市經營模擬遊戲，起建築物同設施自然最為關鍵，因應貓貓所擁有嘅專業技能同特性將可解鎖相應類別建築，起完之後仲可以細心自訂內部裝潢，好動森。起野之外，閒時要訓練戰鬥專職嘅貓貓，因為喺島上不時會有入侵者進入村莊搶略，要有防守能力。最後，當社群發展都咁上下時，貓數眾多開始難管理，就要花時間尋找有潛力嘅貓貓，培育佢成為貓群領袖，由佢去幫你管理各細項事物。

除咗發展喵喵村落，遊戲有提供不同任務，例如檢查附近有無釣魚點、尋找寶物等等，好多時都需要去村莊外面完成。同時島上另一邊有老鼠村存在，適時準備長征亦係遊戲主要目標之一。

《喵星總動員》（Catizens）正進行搶先體驗，預計會維持六個月時間，之後會持續加入更多職業、關卡、建築物、敵人及故事，對應平台為 PC Steam。