未見過Batman可以咁搞笑《LEGO蝙蝠俠英雄傳》觀後感

三年前《The LEGO Movie (LEGO英雄傳)》「Everything’s a Product」已經比大家唱到街知巷聞,你唔知點嚟?比返當年 Screen Junkies 嘅 Honest Trailers 你睇返啦!

史上最大型嘅產品宣傳片嘅第二集唔單只你鍾意 LEGO 會入場睇,仲食埋 Batman 由電視版本開始儲落呢 50 年嘅 Fans Base 一次過推一個更龐大、更花巧、更多產品嘅超級宣傳片。

The LEGO Batman Movie (LEGO蝙蝠俠英雄傳)

不過如果你冇乜了解過 Batman 或者你 Batman 同 Superman都分唔到嘅就真係唔好入場啦!又或者咁,如果你睇完下面呢個片段你識笑的話,恭喜你,你一定會睇得好開心!(唔好話我劇透啊,預告片剪出嚟咋!)

然而你係連 60 年代嘅電視版 Batman 你都睇過,或者你老豆睇過嘅就更加要入場!

其實今次《The LEGO Batman Movie》故事的確比舊作弱左少少,但用 Batman 呢個角色加 LEGO 嘅包裝去講「信任」同「犧牲」呢啲咁大嘅課題,的確又令到小朋友容易入口。戲中仲有一條幾大膽嘅「感情線」,係令到某部份女性觀眾睇得幾「津津樂道」。幸好係 LEGO 動畫大家笑下就算,如果呢條「感情線」係真人電影發生的話,應該會將 Batman推向死亡邊緣 XD

另外粵語配音版預告一出,有好多觀眾都埋怨「張敬軒同劉青雲配到 Batman 同 Robin 講對白好似讀稿咁生硬」,而我地都記得劉青雲經已做過巴斯光年( 反斗奇兵2 / 3 )馬倫 ( 海底奇兵 / 2 ) 甚至加菲貓 (加菲貓 / 2 ) ,我地反而擔心聽到之後同已往角色嘅演譯方式一樣,當然兩位都不負眾望。但粵語配音版就少左啲 Batman Hardcore Fans 嘅笑位而改成一啲大家易入口、啱香港人口味嘅笑話,所以係死忠嘅識點選擇啦!

動畫嘅技巧就遠超舊作多多聲,《The LEGO Movie》係用電腦動畫去模擬 Stop Motion 動畫,今次除左畫面嘅觀能刺激大大增加,空戰、追逐戰清楚明顯。作為 LEGO 迷更要一讚動作設計上肯跳出 LEGO Minifigure 好多嘅舊有框架,解決左好多 Minifigure 本身嘅限制去做出大量 Minifigure 做唔到嘅動作。

以上呢組動作仔細睇佢唔係夾硬將動畫中嘅 Minifigure 身體拉長或者彎曲,而係用左一啲將 Minifigure 折件拍攝硬照嘅方式去放落動畫中嘅 Minifigure,令當中活動性更大去使到 Batman更動感。

講左成套電影繼續以「Everything’s a Product」去吸引大家買 LEGO 玩 LEGO,所以之前介紹過嘅所有《The LEGO Batman Movie》Set 同 Minifigures,你都可以喺戲中見得返之餘,仲有兩大個彩蛋係準備公佈嘅產品,其中一個更加係關於LEGO DIMENSIONS》嘅未公佈合作 (可能等到正式公映後就會公佈),所以大家落足眼力睇啦!

阿九

阿九 打機 - 識少少;玩具 - 識少少;睇戲 - 識少少;動漫 - 識少少..... 買膠、派膠、分享膠!Only The Best Is Good Enough! Lego Enthusiast https://goo.gl/HRnxDW

追蹤

更多文章