【遊戲感想】2B 白色胖次唔係重點《NieR:Automata》2017 年重生與破滅的最美樂章

 

《NieR: Automata》日文版出左一段時間,唔知大家玩成點定係等緊四月推出嘅中文版?雖然呢個遊戲一開始吸引大家眼球嘅絕對係女主角 2B 經常不慎野外露出嘅白色胖次,但係如果你以為遊戲入面會有好多福利就未免太天真:喂,呢個係 NieR 系列第二作黎架!如果話上集《NieR Replicant》嘅劇本係虐嘅話,今集個劇本係更虐,咁樣講係就係中二左啲,但亦都係事實;所以本身有啲咩情緒問題抑鬱之類嘅朋友,最好唔好夜闌人靜或者落雨絲濕先黎玩呢個遊戲,因為你或者會玩到好灰。

 

 

西元 5012 年嘅時候,地球受到外星派黎嘅機械生命體侵略,僅餘嘅人類避走去左月球。為左搶返地球,戰鬥人型「寄葉部隊」因而成立;遊戲開始時已經係西元11945年,「寄葉部隊」正式向地球發動嘅第十四次戰爭。

玩家可操縱角色為分別為 2B(Battle)、9S(Scanner)以及 A2(Attacker)。

主角利用傳送點往來宇宙總部「Bunker」以及地球上面嘅支部 Camp Site「Resistance」;而地球一開始可以探索嘅地點叫做「廢墟都市」,隨住劇情推進,可以探索嘅地圖會逐點開通。

 

宇宙總部「Bunker」

 

雖然隻 Game 整到個地圖好大,但係佢只係一個假 Open World,可以去到嘅地方或者通行嘅道路其實都已經 Fix 死咗,呢一點我覺得好可惜!同埋佢地圖嘅設計其實好難睇,因為每個地點都有好多階段差,不過地圖入面就只會見到一 Pat 嘢咁,對於剛剛入 Game 嘅朋友黎講可能會睇得好躁底⋯⋯不過幾個支線就慣架啦。

 

搵支線地點時搵餐死嘅地圖

 

有朋友話《Automata》個畫面太灰濛濛好死氣沉沉,咁就當然啦,地球將亡人類滅絕,你想個世界有幾色彩絢爛啊?用 Monotone Color 一來符合個世界觀,二來就係劇情入面見血嘅部份會變得更加突出(喂)同埋以黑白灰色調表達畫面嘅多數係人類文明;如果返到大自然嘅話畫面會變返好柔和嘅綠色。其實我覺得咁樣都代表遊戲隱喻緊個結局比玩家聽……不過故事嘅野呢度就唔講住。總之,遊戲場景唔多,但精緻,比幾幅圖大家睇吓。

 

用2B玩動物騎行的話可以大量見到露屁屁Scene

絕對領域擠出黎嘅大腿肉都有好好展示出黎

 

武器嘅配搭係自由嘅,外加一個輔助機「Pot」負責同總部通訊、喺戰鬥中進行射擊、掃瞄地圖上隱藏資源⋯⋯同埋釣魚。我永遠都唔明點解可以成部電腦車落水咁釣魚,而啲魚又真係會上釣⋯⋯不過魚不能不釣,除非你唔打算全武器收集啦!部份武器喺遊戲店舖入面係買唔到的,可能喺地圖嘅隱藏地點,有啲就需要你釣上黎,自己的刀自己釣!

 

佔左故事好重戲份嘅輔助機「Pot」

可以喺 Menu 睇返各個任務嘅進度

 

所有戰鬥配備包括 Pot 都可以升級,升級材料同資金就可以喺平時戰鬥或地圖探索中獲得;另外可以靠做支線任務賺錢。不過,部份任務有時限,主線劇情推後就會自動消失,而每個角色可以負責嘅支線都唔同;想「100% Quest」嘅玩家就自己注意吓啦!

如果開通左網路機能,就可以喺地圖上「執屍」,即係回收其他在線玩家嘅死體,從而獲得經驗值同埋資源;你自己死左都會喺其他玩家嘅遊戲入面出現。雖然就咁聽好似覺得件事笨笨地,但因為執屍偶爾會拎到罕有嘅道具……大家加油 (´・ω・`)

 

正名其實係執屍Play

 

除左地面戰鬥之外,遊戲部分情節仲會出現戰機或者機械人射擊模式嘅操作。

嗱,問心個機械人設計係靚嘅,但戰機模式唔可以自由切換使用,明明部機咁靚嗚呀!不過劇情有提及過出動戰機好高 Cost,咁我唯有同自己講唔比我下下出機械人係為咗幫總部慳錢啦 orz

 

 

彈幕係戰鬥經常出現嘅原素之一,喺遊戲前半部我仲同總編森麻大人講「NieR 個彈幕 Play 都無料到嘅!」,但玩到後面……今天的我打倒昨日的我,sor9,原來彈幕都真係有難度,特別係敵軍超密集嘅時候,你知唔知個難度喺邊?係對眼會好攰,好想標眼水!

好啦我認真。用戰機玩彈幕戰反而唔難,但係地面戰鬥呢,要同時左菇控制武器+右菇控制 Pot 嘅射擊方向,又要睇住幾時係最好時機撳 L1 出超必,兼要長期撳住 R2 黎閃避或者加速……講完都覺得有啲亂!不過戰鬥方面嘅流暢度係爽嘅,操控亦好易上手,而喺大家睇到呢篇文嘅時候,相信好大部分嘅遊戲 Bug 都已經 Fix 咗(喂)

 

 

如果你覺得戰鬥仲係難嘅可以玩 Easy 嘅⋯⋯Easy 模式會跟一堆自動攻擊晶片,不過呢堆自動攻擊晶片除左近身戰之外其實操控性麻麻,偏偏遊戲後半部份有好多需要 Hacking 嘅地方,亦有好多彈幕戰,所以我建議大家都係習慣自己玩啦!練熟彈幕戰對你衝真・結局會有利好多。

 

 

遊戲會出埋中文版固然係好事,咁可以比多啲朋友睇得明個故事;不過,遊戲入面連文字嘅表達都係一種美學(例如平假名同片假名嘅使用轉換等等),要將啲對白同內容譯得言簡意賅一定好難……希望到時中文版出咗黎,都仲保持到日文原文嗰種藉由文字表達嘅美感啦。

最後不得不提嘅係音效方面,遊戲嘅背景音樂做得非常好,而 9S Hack 入 Network 嘅時候音樂會變成 16bit,幾有心機!我衝關嗰排幾乎日日煲佢隻 Soundtrack!如果你仲未入手遊戲嘅,不妨試聽以下呢首主題曲「Weight of the World」(日文版「壊レタ世界ノ歌」)去感受《Automata》空虛而寂寞嘅世界觀。

 


 

有關遊戲系統部份嘅介紹就講到呢度,對《Automata》有興趣嘅朋友而家預購中文版仲有限時特典送喔!記得留意啊!

推出日期:2017.02.23(日文)/2017.04.27(中文)

 

神婆

神婆 真身為非典型占卜師,唔神秘,無形象,為咗兩隻貓嘅生活努力奮鬥。日系遊戲及 JRPG 專攻,重度聲優控。首本個人塔羅散文今年書展上架:shorturl.at/iDMWY

追蹤

Facebook 更多文章