推出市面已經一排嘅《無雙大蛇 Orochi 3》唔知大家打爆機未？定係你仲考慮緊入唔入手？見到「無雙」兩個字，唔知大家有咩感想，但係對於經歷完《真三國無雙八》假刺客・真開放世界嘅我黎講，黎到《Orochi 3》見返一眾熟悉嘅武將臉孔、再次搵返打無雙一騎當千嘅爽快感，或者我不得不承認：傳統無雙嘅玩法，始終係有佢嘅樂趣喺度的。

我係《戰國》系列嘅 Fans，今次《Orochi 3》以井伊直虎擔大旗，都幾令我驚喜；雖然你可能會話「喂我未打爆機，唔好劇透」，但係我好老實講一句，呢個遊戲嘅劇情重要咩 LOL？咪就係人神混戰囉！

所謂神化嘅真正用途，根本就係攞正牌派福利……

玩《 Orochi 3》嘅時候，相信好多女性玩家同我嘅重點都係一樣，就係用一種「睇住一班正經八百嘅武將去耍中二」，如果你有心機睇對白、睇哂角色事件，你就會明我嘅意思係咩。

例如下圖。
我真係好想知置鮎龍太郎同埋綠川光做呢段配音嘅時候係乜野心情……

司馬師 vs 明智光秀：兩位師兄，出面大混戰緊嘅時候討論頭髮順滑度真的好嗎？LOL

又或者係周泰呢句對白，令我笑左好耐……

咁當然，遊戲並唔係一味惡搞，某啲劇情安排，其實係非常有心思的。

如果你同我一樣，玩足咁多代《三國》《戰國》，或者你會好明白我嘅意思。例如石田三成呢個角色，性格有幾彆扭幾傲嬌，相信都唔駛我多講，佢想證明自己叻豬，想話比全世界知自己有用，所以，呢個中二小朋友就算穿越到異世界（無誤）本質都係無變的：佢好想得到手環嘅力量。

但係好慘豬嘅係，就算三成利用手環力量，但係打輸比玩家嘅話，阿瑞斯依然係無毫不留情咁鬧佢廢物…所以我每次打死石田三成，我都會有種好愧疚感，對唔住 orz

有啲朋友話唔鍾意《Orochi》系列亂咁黎，但係如果你將佢當成係惡搞 Game 嘅其實可以玩得好歡樂。今集除咗可以於戰場上切換三位角色之外，仲會有四位輔助角色去做能力加乘；每次出合體神技時，就會見到七個角色集合七龍珠之力使出龜波氣功，一招技清場，都咪話唔爽。

呢個七星戰隊嘅畫面，亦都為我帶來好多樂趣，例如：

娘娘收兵圖

織田三角戀＋美男子七星伴月小隊（個人喜好有）

……所以玩到後期，我基本上係唔理能力加乘呢個要素，純粹以喜好同埋視覺享受黎揀角色 LOL

今集《Orochi 3》可以話喺回歸《無雙》原點之作，又或者咁講，佢將《無雙》系列入面良好嘅系統，例如武器技能鍊成、出外修行等等系統都拎返出黎用，而戰鬥方面，話明係《無雙》就當然要有切菜嘅爽快滿足感先得。除咗角色自己固有技之外，今集加入嘅「神技」種類雖然唔多，但係拎黎斬草清場都係唔錯選擇，例如其中一招「神酒」簡直令我迷醉，放工返去開「神技」無雙，絕對係一種治癒 Play！

無論牛鬼蛇神，全部都係雜草！

敵兵造型雖然個個大眾臉，不過今集有一隻怪令我印象好深刻，就係樓下呢隻「幻靈」。第一眼睇時，我仲心諗做乜《Bloodborne》啲克蘇魯怪物走錯棚！另外有朋友話佢嘅造型好似《Harry Potter》啲 Death Eaters……

長手手 Play

無論你係為左切菜，定係為左同一班角色聚舊，相信你總能夠喺《Orochi 3》入面搵到佢嘅樂趣。一班新角色好無用？見仁見智啦，例如我有機友就好鍾意用雅典娜，因為佢係聲優三森すずこ嘅 Fans；另外有機友就好堅持淨係用《三國》經典武將，對一班新角色不感興趣；有機友淨係開 Easy Mode 一味通關，亦有機友一黎就玩最難，見到「混沌」關卡就走去追黎玩……

點樣玩，由你揀，遊戲樂趣定義，一向每人不同。反正今集遊戲連埋支線劇本在內，都有極多關卡，每個關卡亦有三個任務要達成，以消磨時間黎講，絕對係唔錯選擇，你仲可以同朋友開房聯機刷關卡，都算係遊戲嘅新突破～

綜合黎講的話，《Orochi 3》絕對係中規中矩之作，買隻擺喺屋企休閒玩又好，招呼朋友都好，相信都係有樂趣的。

最後送上官方中文版宣傳片：