【回顧】《櫻花大戰》考古!與《新櫻花大戰》大不同,新版又啱唔啱你口味?

 

大受歡迎遊戲《櫻花大戰(サクラ大戦)》系列,第一集面世時為 1996 年,當時對應平台為 SEGA Saturn 機種。

遊戲正傳一共推出過五集:

1996 年《サクラ大戦》、1998 年《君、死にたもうことなかれ》(日本篇、Saturn)
2001 年《巴里は燃えているか、2002 年《恋せよ乙女》(巴黎篇、Dreamcast)
2005 年《さらば愛しき人よ》(紐約篇、PS2)

大家熟悉嘅萬年女主角真宮寺櫻,就係出自頭兩集遊戲作品。

 

歷代主角 credit to [email protected]

 

事隔多年,SEGA 話要喺 2019 年為玩家帶來「驚喜」,然後,上個月,終於在千呼萬喚中,宣佈 2019 年冬天將會推出《新櫻花大戰》。如果話呢個係驚喜,不如話係既驚又喜,但又有種複雜嘅情緒。

首先,人設擔當由藤島康介&松原秀典老師換成《Bleach 死神》作者久保帶人老師,雖然久保帶人老師筆下作品出色,不過相比以畫風優雅華麗見稱嘅另外兩位老師,《新櫻》喺視覺感覺上嘅變化,對 Fans 黎講,都真係有啲衝擊(重申:我無話唔靚!無話唔靚!只係……只係覺得呢個人設擔當嘅選擇好有趣!)

加上新作品變成全 3D 模組,驟眼睇赫然有幾分《JUMP FORCE》嘅感覺

 

 

畢竟《新櫻》未正式上市,用遊戲畫面黎比較好似唔公平,所以我地一齊睇黎下兩代《櫻花大戰》原畫嘅比較:

 

舊版

新版@《少年 Jump》附錄 Poster

 

日本當地網友對於兩種畫風評價各異,有人認為「時代轉了也該接受新事物」,亦都有人認為「明白 SEGA 想令玩家感到變化,不過起用畫風感覺如此剛硬的久保老師真的適合嗎?」。

喜好嘅野,各人想法不同。不過,要說《新櫻花大戰》與舊版最唔同嘅地方,應該係系統。

《新櫻》係 3D 冒險動作遊戲,而唔係《櫻花》嗰種文字戀愛以及回合戰棋玩法,雖然相信遊戲當中亦會存在「角色育成」嘅部份,不過可以見到 SEGA 真係用盡心思希望帶比大家一個全新嘅《櫻花大戰》體驗。

 

 

《新櫻》背景年代為太正時代 29 年(太正為遊戲獨有架空年代,以日本大正時代為背景);而《櫻花大戰 1&2》當時為太正時代 12 年及 14 年。

距離初代遊戲約 15 年後嘅「新花組」,無論係成員以及隊長都有所不同,比較令我在意嘅係,今次「大帝國劇場」仲會否作為主要舞台登場呢?前作主角們以及大神一郎又會唔會作為 NPC 角色出場呢?

講開劇場,《櫻花大戰》裡面「大帝國劇場」嘅設定,其實係有參考真實歷史建築而創作出黎的。「大帝國劇場」嘅名,係融合「帝國劇場」(明治 44 年開幕)以及「寶塚大劇場」(大正 13 年開館)嘅意念。

 

帝國劇場(左)舊寶塚大劇場(右);圖片來源自網路

 

而外觀以及內部建築就參考左「横濱市開港記念會館」(大正 6 年開幕)

 

遊戲版 OP 畫面

圖片來源自「横浜開港記念会館 – 横浜市」官方網站

遊戲裡畫面

遊戲設定集平面圖

横濱市開港記念會館平面圖

 

當時玩完遊戲考據返好多場景嘅真實性,都係玩家嘅樂趣之一;《新櫻》其實同樣地有喺呢一點上面落心機,例如首段宣傳片中大家見到嘅呢個場景,我猜測可能係取材自「京都四條南座」?呢個地方於江戶時代初建,於大正 2 年改建,可以話係日本歌舞伎嘅起源地,亦係日本歷史最悠久嘅劇場之一。

 

大正年代「京都四條南座」

 

以上同大家分享左少少有關場景方面嘅想法,唔知啲畫面有無喚起你部份回憶?

無論你本身係唔係《櫻花大戰》Fans,相信呢隻 SEGA 今年最新力作都會係各界注目所在,雖然心中略有擔憂,不過,真香,《新櫻》仍然是 2019 年冬季必玩之作。隨住《新櫻》之後有更多消息公佈,我地會再同大家進一步跟進的。

最後,係《櫻花大戰》以及《新櫻花大戰》兩代嘅主代曲片段:

 

神婆

神婆 非典型占卜師,唔神秘,無形象,除了鐘意聽客人講故事,夜間興趣係打機睇動漫同玩貓;日系遊戲及 JRPG 專攻!

追蹤

Facebook 更多文章