原本應該係上年推出既觸目大作《Code Vein》一拖就拖到今年年尾推出，但係呢段時間改咗啲乜就真係無人知。咁到底呢隻由《God Eater》班底製作，被喻為 Bandai 版《Dark Souls》既遊戲值唔值得期待呢？我地有幸成為唯一受邀請媒體參加香港獨家試玩會，直頭好玩到唔想走丫！

開始前講少少遊戲背景，呢個世界因為「審判之棘」既出現而崩壞，存活既人類為咗生存而蛻變成吸血鬼（不過外出活動時都需要戴上口罩，成件事好「東京喰種」），佢地需要「吸血」來維持理性。但係當攝取血液量不足就會失控，變成喪失理性只剩生存本能既「墮鬼」。

口罩都有得自訂，啲款仲幾鬼中二

福利圖

正式進入遊戲之前，第一件事梗係捏人，同《Dark Souls》系列唔同，佢並唔係逐部份比個參數你慢慢修改，而係有大量預設既眼耳口鼻、面型、髮型等比你揀，整體黎講顏值都頗高下，對我呢類懶人黎講簡直係福音。（DS我次次都求其整就算，反正都無乜幾可見到自己個樣）

遊戲有大量 Cut-in 見到自己靚樣

選擇極多，顏色配搭更加係多到痴線

遊戲正式開始會進入教學關卡，都係教點攻擊點避呢類簡單野，要注意呢度有二樣玩家必睇既重要資訊。

第一樣就係「Blood Code」（血碼），可以理解為呢個世界既職業。

係現時既試玩版入面，玩家初始已可選擇三種血碼，分別係基本既「鬥士」、遠程既「漫游者」、仲有一個係專門打反擊既。每種血碼除咗基本能力參數有分別之外，仲對應唔同既被動、主動技能以及相應既武器，例如使用「漫游者」就無法使用重武器，而玩家可以於遊戲中途隨時轉換血碼。（不過隻 Game 無得暫停，係無怪既情況下先好換）

選擇極多，顏色配搭更加係多到痴線

轉換血碼除咗上述分別，仲會改變一樣野，就係閃避既「類型」。

例如「鬥士」閃避既方式係「翻滾」，「漫游者」就會變成「跳步」（感覺上更靈活），另外仲有其他類型閃避方式，例如「重型翻滾」。

另外每把武器都會有自己獨有既攻擊技，就算同樣係單手劍都會有「突刺」、「跳斬」等攻擊技，變化豐富。

即使同一種類武器亦會有唔同技能，圖為廢廢地既「跳斬」

第二樣必學既就係「吸血」，係呢個遊戲入面吸血同大家既理解有啲唔同。

正常黎講，大家見到吸血二個字，直接會理解為「吸血補充自己生命值」，我開頭都以為係咁，但當我試黎試去「吸血」都會補自己行生命值時，我發現自己錯了。

原來係呢個遊戲仲有個數值叫做「冥血」，顯示於畫面右下角，係使用技能必需既數值，即係 Mana 之類野，使用「吸血」技能不但可補充冥血，仲會提高上限，部份技能需要突破角色本身冥血上限先出到，而呢個系統係遊戲中佔非常重要既地位，後面會再講解。

背刺都可以吸血，把握機會盡量提高冥血上限非常重要

正式進入遊戲，第一章既敵人未見有咩威脅性，不過同《Dark Souls》系列相似，同時對付幾隻就會有危機，所以都係盡量一隻一隻打。呢個地圖玩家可以練習 Parry 技，即係《Dark Souls》系列「盾反」，不過佢既盾反時間有啲古怪，按 L2 之後並非立即有反擊判定，按完大約 15f 左右先會反擊成立，需要少少先讀。

探索完第一部份就正式進入第一隻頭目戰，可能係第一隻王關係，難度都頗低，擊敗頭目之後就會進入據點，而試玩就係呢度完結……表面上。

擊敗頭目後，玩家會獲得記錄該頭目能力既新血碼，玩到呢個位我先知道原來主角係「洛克人」

其實今次試玩真正好玩既部份，係接住落黎既「高難度特殊深層地圖」。

係據點中可以作出各種強化，武器同防具（牙裝）除咗基本強化外，仲可以作出「質變」，即係幫武防附上火冰雷之類屬性。比較特別既係《Code Vein》質變比起《Dark Souls》多出二個新屬性，一個係「輕」即係減攻擊力同時減輕重量及精力消耗；另一個屬性「停」，會增加緩速值，可惜既係今次版本並無開放，無得實測。

「質變」屬性‧「停」，未知使用效果如何

進入深層區域，呢個地圖構造簡單，基本上係一個大既十字型。係呢個地圖正前方大門呈上鎖狀態，需要攻略其他三個地方拿取鎖匙。而呢三個地方不但頭目強勁（有三隻係打孖上），連小怪都二三刀埋你單，非常可怕，廢話唔多講，直接去片！

打晒三隻頭目之後，打開前方大門，迎接你既就係今次試玩版既頭目，亦都係《Code Vein》團隊展示佢地實力既地方。

頭目「冰刃隨從」詳細攻略就唔多講，大家睇返上面條片應該直接啲，係呢度反而想講下《Code Vein》呢隻遊戲有深度既地方。

Boss 打孖上，頗有難度

前面提過，要使用技能就要用到「冥血」，係戰鬥中有幾個方法可以吸血的，分別係 Parry、按實 O 儲力、以及攻擊中按 R1+O（連續吸血），一般黎講最大機會使用既就係「連續吸血」。唔係話打王唔用得 Parry，但一來要先讀，二來失敗的話就會被秒 / 放血，保險起見都係用連續吸血穩陣。

但係連續吸血亦有佢既弱點，由於呢隻遊戲唔似《Dark Souls》、《隻狼》咁，攻擊中途可以隨時翻滾 / 閃避，係《Code Vein》入面要整個攻擊動作完結後先可以翻滾，而連續吸血既收刀動作係極慢，所以係咩時候用變得非常關鍵。

即使係頭目，只要你兜到去佢後面都可以使出「背刺」吸血

而呢個遊戲每一位敵人都會有佢既「破防值」，成功打爆破防值敵人就會跪低任你砌，即使係頭目亦唔例外。聰明既讀者睇到呢度應該估到破防時就係使用「連續吸血」既時機，係呢個時候到底係 Chur 盡狂攻隻王，定係用「連續吸血」去補冥血（招吸血傷害超低），就要睇各玩家既戰術分配。

Boss 跪低就梗係衝埋去開餐

不得不提既就係冥血既重要性，可能有人會話「車，我唔用技咪得囉」。無錯既，但呢隻遊戲即使係單人遊玩時都會有個同伴跟住你，除咗幫手打、出合體技之外，最重要既功能就係當你死亡時，佢可以使用技能分自己部份生命值出黎復活你，同樣地你都有呢招技能可以復活返佢，只要有冥血的話二條友就有接近無限生命，如果同朋友連機時冥血需求量將更高。

留意右邊紅圈技能，只要有冥血同埋非 CD 中，就可以分部份生命值出黎復活同伴

總結：

今次《Code Vein》既試玩版完成度極高，雖然仲有唔少地方要執（例如 Drop Frame 問題），但係整體水準極高。如果今年唔係有《隻狼》的話，隨時勇奪 2019 最佳動作遊戲。加上超強大陣容聲優、同「東京喰種」極為相似既設定、討好既人設、適當既難度（大約《Bloodborne》難度），話佢係年尾最觸目遊戲絕無誇大，動作遊戲迷必入！

《Code Vein》預定於 2019 年尾推出，對應平台 PS4 / Xbox One / PC Steam。