【遊戲新聞】《權力遊戲》免費遊戲《臨冬城之戰》 親手指揮部隊抵抗夜王

有睇第八季嘅《冰與火之歌:權力遊戲》(Game of Thrones)朋友,一定對第三集「The Long Night」入面嘅大規模戰役「臨冬城之戰」印象深刻,除咗狂派便當之外,最令人垢病嘅當然係神級「戰術」。最近就有位 Fans 製作咗一隻小遊戲,比玩家由自己落場指揮「臨冬城之戰」,原來真係好難玩……

 

 

遊戲名稱叫《Winter Falling》,由一位叫做  Rarykos 用 Unity 引擎製作,屬於策略遊戲類型。遊戲背景一睇就知道係「臨冬城之戰」,而遊戲就只有一個目標,就係迎戰及擊敗「夜王」(The Night King)。由於係網頁遊戲關係,雖然係策略類遊戲,不過就無得好似平時啲 AOE、Warcraft 咁有得直接控制小兵,只能夠用命令型式操控。

 

 

遊戲開始前,會先叫你作出部隊部署。玩家需要先設置陷阱,除咗可以令敵部隊減速之外,亦都可以使用「點燃」指令,令敵部隊持續受傷,不過需要注意第一次點火係必定失敗的。起完陷阱之後就要部署戰鬥部隊,可配置種類及數量會玩家選擇而改變(但係對方會以你出戰兵數再以倍數增加),最大可配置 2 隊劍兵、2 隊槍兵、2 隊弓兵、1 隊騎兵、1 隊投石兵、3 位英雄及烏鴉,如果烏鴉陣亡就會判定玩家輸。

 

點燃非常強力,可惜只能用一次

你投放越多人,敵軍相應亦都會越多人,你加一個對面就加五個咁

 

玩家初始只有三種指令,上面講過嘅「點燃」,仲有騎兵衝鋒以及部隊突擊,不過部隊突擊衝出去之後係唔識自己返去陣地的…….。

 

 

除咗以上指令,只要擊破敵軍中有盾型符號單位就會得到戰術點數,儲夠一定數量就可以使用更高階如補血、召喚飛龍噴火等高階技能。不過當你殺到咁上下時,夜王又會再令班軍隊復活返,莫講話要打低夜王,連捱多陣都好困難,我地最叻都係打到前 39%,有興趣嘅朋友不妨去挑戰下!

 

當你以為勝卷在握時……復活!

最叻都係打到 39%

 

《Winter Falling》傳送門

 

五木

動漫電玩宅,極愛金田一系列,擅長動作及策略遊戲

追蹤

更多文章