【LEGO快訊】LEGO收購全球最大網上LEGO交易平台BrickLink 以加強成年玩家群為名 實質並非如此?

砌開 MOC 或者 AMOC 嘅玩家,點都聽話啲前輩、師兄話「去 BrickLink 執件啦!」BrickLink 呢個全球最大嘅 LEGO 網上交易平台。先講少少歷史,其實 BrickLink 係由 Daniel Jezek 喺 2000年創立(當時仲係叫 BrickBay) ,不幸地 Daniel Jezek 喺 2010 年意外離世之後,BrickLink 就交由佢嘅屋企人打理。

直到 2013 年由韓國網絡遊戲商 Nexon 嘅老細金正宙以香港有限公司 BrickLink Ltd 名義持有,並以 Daniel 開創 BrickLink 嘅初心「為全球 LEGO 迷提供高質素服務平台,推廣個人化並友善嘅網上交易平台」繼續營運。依家 BrickLink 呢個平台只係會員都有過百萬,並且有過萬間網店喺當中營運。

而今日樂高集團 The Lego Group 正式收購左呢個全球最大嘅 LEGO 網上交易平台(仲有間韓國嘅第三方 Bricks 製造商 Sohobricks 同時被收購),樂高集團就以加強發展成年LEGO玩家 (Adult Fan of Lego = AFOL)嘅互動同社區性,所以作出呢個收購行動。(官方新聞稿)

 

 

其實聽落你已經覺得唔多妥,收購最大網上交易平台去「鞏固」成年玩家群組?

玩家們第一個反應都話其實樂高集團係咪想壟斷呢個非官方市場為實?

而多個外國 LEGO 媒體第一時間搵左樂高集團營銷總監 Julia Goldin ,問及今次收購對 BrickLink 會唔會有好多嘅改動。雖然 Julia 話短期之內唔會作出任何變化,並且會繼續以現行模式運作。雖然樂高集團表明 BrickLink 呢個網上交易平台享有獨立性,並唔會影響市場及買賣情況,但係玩家反應絕對唔樂觀,而且……..

同林鄭一樣講大話,其實佢地已經決定要影響 BrickLink 中部份網店!

 

鍍鉻零件 (Chrome Parts)

 

The Brother BrickJulia Goldin 訪問當中提及到 BrickLink 有住一啲第三方組件以及鍍鉻零件 (Chrome Parts) 嘅專門商戶,第三方組件同 LEGO 組件兼容或者係以官方組件加工,但喺樂高集團收購 BrickLink 之後將會逐部消失,而首當其衝嘅會係以 LEGO 兼容嘅軍事配件生產商 BrickArms

 

 

BrickArms 產品

 

另一批直接影響嘅就係創作者群BrickLink 有住自已一套 LEGO 創作軟件(Stud.io,或全新嘅 PartDesigner),好多 LEGO 創作者都會將作品製作書組件清單放上 BrickLink 比其他玩家購買以及使用 BrickLink 方便性去選購所需組件。LEGO 創作軟件會唔會受影響?往後作品嘅版權會唔會有所改變?但肯定早前所搞嘅 AFOL Designer Program (年長 LEGO 玩家設計師計劃) 同 LEGO Ideas 有住明顯衝突,相信再有嘅機會都非常之難。

 

 

好多玩家們已開始「轉移陣地」到另一個網上交易平台 BrickOwl,想令到樂高集團今次嘅收購變成「得個桔」。但係 BrickLink 仲有住龐大嘅交易數據,邊啲零件特別多需求、邊啲產品唔賣得、網店定價等等資訊,對樂高集團往後嘅行銷策略有住極大幫助。

所以美其名係打住為成年玩家著想嘅旗號,但實質上係啲咩動機?我諗真係要大家放長雙眼睇清楚啦!

樂高集團收購 BrickLink 官方新聞稿

 

阿九

阿九 打機 - 識少少;玩具 - 識少少;睇戲 - 識少少;動漫 - 識少少..... 買膠、派膠、分享膠!Only The Best Is Good Enought! Lego Enthusiast https://goo.gl/HRnxDW

追蹤

更多文章