【試玩感想】請當成全新 IP 去玩《人中之龍 7 光與暗的去向》或者你會認同玩落係 Cult 得有趣

 

即將於 2020 年 1 月 16 日繁體中文同步發行嘅《人中之龍 7 光與暗的去向》,相信好多《人龍》Fans 同我一樣,既好奇,亦不安。

「桐生一馬」篇完結了,好多 Fans 覺得不捨,我亦然;不過,佢想金盤洗手咁多年,我地再鍾意呢個角色,都應該比佢退下火線休息下。之但係,新主角換上「爆炸頭」春日一番,玩法由動作武鬥變成 RPG,變化太大,舊玩家無所適從,絕對可以理解。

 

 

未玩過一隻遊戲之前,我地絕對唔會妄下判斷話佢係「好玩」定係「唔好玩」,所以,抱住探知求新嘅心情,早前《人龍 7》嘅 Demo 版本於 PS Store 上架,玩落,其實無想像中咁突兀,有啲玩法仲幾有趣。

當然,你要明白,玩《人龍 7》同以前玩《人中之龍》將會係完全唔同嘅感受。

如果桐生年代《人龍》帶比你嘅係一板一眼嘅鐵漢柔情,春日一番版本嘅《人龍 7》就係「認真地去惡搞,惡搞得黎有少少 Cult,Cult 得黎你又會唔知點解笑」,同時用呢種方式去交代出另一種感覺嘅極道故事。

題外話:唔知大家有無睇過一套日劇作品叫做《勇者義彥(勇者ヨシヒコ)》?由山田孝之主演嘅作品,全劇就係用力地惡搞,《人中之龍 7》帶比玩家嘅,就有少少似係《勇者義彥》嗰種令你不禁失笑嘅有趣感覺。

 

 

今次嘅 Demo 版本,比玩家可以試玩第四章部份劇情,但係主要都係比玩家感受全新遊玩系統,以及各種小遊戲。

雖然只係試玩版,不過可以去嘅區域依然極多。新版圖由神室町改為橫濱,下圖大家見到嘅只係半個地圖,上半部仲有一樣大小嘅未開放區域,相信淨係要去哂所有地方都會花上唔少時間。

 

 

「戰鬥」相信係各位玩家最在意嘅問題,由動作變成 RPG,到底係唔係大家想像中咁奇怪呢?

我歷代《人龍》同埋外傳都玩到滾瓜爛熟,剛剛進入《人龍 7》戰鬥時,面對住 RPG 制式,的確有少少疑惑;不過經過大約五、六場戰鬥之後(大街上會標示雜魚敵人所在位置),稍為抓到手感之後,其實轉左 RPG 都有佢嘅樂趣喺度。

 

 

先黎講一講《人龍 7》嘅轉職系統。除左大家先知已知嘅「勇者」,呢個遊戲可以揀嘅職業真係好多元化,例如我一入 Game 就幫春日一番由「勇者」轉職做男公關。

 

露宿者行去就業中心就可以轉職做牛郎……

 

每個職業有唔同屬性,而攻擊技能都會有分別,例如「男公關」嘅攻擊技能就係拎住枝香檳打人、或者係噴人,令到敵人重感冒或者飲醉酒而落敗;就咁聽好似好低能,但係玩落幾爽快,有一種微妙嘅治癒感。

 

射呀射,射他吧!

女性用「媽媽生」就係用手袋抽擊

 

至於由《人龍 6》開始沿用嘅「無縫地圖場景」設計,黎到《人龍 7》更加運用純熟。呢方面係要讚嘅,因為遊戲內場景都多,不過 Loading Time 唔會因此而變耐,所以就算係進入戰鬥、或者進入餐廳,都唔會因為 Loading 而影響體驗。

同埋,今次《人龍 7》探索部份做得幾真實,行過汽水機會撿到零錢或者「銅盤」之類可以變錢嘅道具。

 

 

仲有一樣我最鍾意嘅設定,就係喺今集建議大家嚴守交通規則,以前桐生一馬行出馬路,啲車通常都會停低;但係,今集啲車會撞埋黎,仲會扣血!我因為衝燈扣左 100 HP!

 

好孩子不要學

 

探索部份當然不能不提各式食店,今集除左大家食慣嘅「銀章魚燒」同埋「養老乃瀧」,因為場景唔同左,亦會多左一啲大家未見過嘅新酒吧同餐廳。進食會有獎勵同埋狀態加成,係好典型嘅 RPG 設定。

 

飲醉酒進入戰鬥時,角色有時會有受控制(混亂狀態)

 

《人龍》系列其中一個經典環節,就係佢眾多小遊戲。《人龍 7》繼承系列風格,除左喺遊戲入面安插唔少 SEGA 從前舊作品比玩家遊玩之外(例如《Virtual Fighter 2》)、仲有改良版嘅卡啦 OK。

 

Virtual Fighter 2

唱 K 畫面靚左

 

同屬 SEGA 嘅 ALTUS 早前推出嘅遊戲《Catherine Full Body》,遊戲講緊主角只要一瞓著就會進入惡夢,而遊戲最具代表性嘅邪惡綿羊,今集亦加盟《人龍 7》;玩家去睇戲時就可以玩到呢個同睡魔對抗嘅遊戲。

 

 

玩法就好簡單,畫面上會隨機出現 PS4 手制上面嘅按鍵,按中就可以抵抗睡魔;如果按錯公雞頭公仔就會扣血,係一個操作簡單,但非常考反應嘅小遊戲,極有難度!如果你同朋友一齊去睇,而你成功抵抗睡魔,仲可以加好感度添。

 

 

除左 SEGA 自家嘅作品,《人龍 7》亦有唔少向其他廠商遊戲「致敬」嘅部份,例如「勇者」設定係黎自 Square Enix《勇者鬥惡龍》、仲有模仿《Mario Kart》嘅《Dragon Kart》,玩家要於賽道上面獲取金幣,亦可以拎道具去攻擊其他對手!

試玩版裡面路線就得一條,期待正式版可以挑戰更高難度。

 

 

另一個為左春日一番「街友」身份而設嘅新遊戲,就係鬥快收集鋁罐,路上面會有其他街友同你爭,所以儲氣之後要撞開佢地搶走佢地啲鋁罐。係一個完全體驗弱肉強食(!)以及搵食艱難嘅遊戲。

 

今次我仲唔發達

 

玩完 Demo 版本之後,或者係因為我用全新眼光去玩呢個遊戲,我對《人龍 7》嘅正式版又唔係咁擔心。正如本文一開始所講,桐生一馬係幫派大佬,春日一番係小混混,你唔可以要求兩個人對於「生存」以及看待「極道」嘅眼光係完全一樣。

《人龍 7》係有好多惡搞嘅成份,但係以趣味性黎講,遊戲依然係有令人會心微笑嘅地方。正式版將於 2020 年 1 月 16 日推出,我而家非常好奇,到底一連串惡搞元素套用到劇情裡面,又會擦出乜野火花呢?

《人中之龍 7》免費試玩版已於 PS Store 上架,純體驗模式,不設存檔過繼系統。

 

 

神婆

神婆 真身為非典型占卜師,唔神秘,無形象,為咗兩隻貓嘅生活努力奮鬥。日系遊戲及 JRPG 專攻,重度聲優控。

追蹤

Facebook 更多文章