【遊戲新聞】開放世界探索元素極豐富《對馬戰鬼》稍延至今年七月華麗登場

 

PlayStation 於網路特備節目「State Of Play」中宣佈,PS4 年頭重頭大作之一嘅《對馬戰鬼(Ghost of Tsushima)》將定於 2020 年 7 月 17 日正式推出,比起原定六月推出稍為延遲一個月,目前 PS Store HK 預購已經開始。

今次「State Of Play」中展示了 18 分鐘嘅《對馬》實機遊玩片段,向玩家簡單地介紹遊戲探索、戰鬥、以及個人化等等系統資訊。

 

 

《對馬》由曾開發《inFamous》系列嘅 Sucker Punch Productions 製作,故事背景設於 13 世紀末,蒙古帝國展開東征,所到之處皆化為焦土。蒙古將帥「赫通汗」,殘忍狡詐,佢率領船隊大舉攻向日本本土,而處於兩者之間嘅對馬島,首當其衝。

伴隨著第一波攻勢,對馬島烽煙四起,境井一族僅有少量武士倖存;而其中一位武士「境井仁」挺身而出,誓死保護人民,奪回家園。然而,為左達成心願,佢必須捨棄武士之道,並開創新嘅道路,成為「戰鬼」,為左解放對馬島,展開一場不循常規嘅戰爭。

 

 

《對馬》係一隻開放世界動作歷險,就咁睇影片時,遊戲喺探索以及戰鬥方面,都有幾分《Assassin’s Creed》嘅影子。探索方面,《對馬》有一個方便玩家嘅特點,就係「風」嘅導向。玩家可以打開地圖,選取自己想去嘅地方,然後於遊戲裡靜止時,就能呼喚「陣風」,去話比玩家知應行去哪個方向。

 

 

同時,作為一個開放世界遊戲,主線以外亦有大量探索元素。例如鳥類會引領你到隱藏區域,狐狸會引導你去隱藏神社,呢啲既係遊戲嘅收集元素,同時亦可以幫玩家 Unlock 各地區嘅 Fast Travel 傳送點。

戰鬥方面,影片展示兩種形式:「武士」及「鬼魂」,簡單黎講,就係明刀明槍嘅戰鬥,以及潛行方式嘅暗殺。唔同嘅戰鬥方式,都有各自嘅特別獎勵,例如「武士」戰鬥方式會要求玩家擅用 Parry 技術等等。根據玩家使用嘅戰鬥方式,遊戲中可使用的武器則會有所變更,例如是匕首、武士刀、弓箭等。

 

 

至於裝備方面就極為個人化。根據玩家嘅戰鬥方式,外觀呈現亦會有所不同,而隨著遊戲推進,玩家會賺取到點數去強化自己各種技能與能力,亦會獲得各種裝備以及道具。同時,玩家可以於旅程中收集花朵,去為自己嘅外觀進行染色。

 

 

最後一個特點係拍攝模式。遊戲中提供幾種濾鏡,例如係電影風格、色彩校正、景深等,甚至連風向以及顆粒調整都可以個人化,對於鍾意玩遊戲截田嘅玩家黎講,絕對係一種另類樂趣。

《Ghost Of Tsushima(對馬戰鬼)》已定於 2020 年 7 月 17 日於 PS4 平台上推出,繁體中文對應。

 

 

神婆

遊戲雜食向,FPS 苦手,全種類 RPG 專攻,重度聲優控。使用機種:Xbox Series X|PS5|Nintendo Switch|Steam Deck。

追蹤

Facebook 更多文章