【遊戲評測】媒體優先試玩速評 《艾爾登法環》新操作系統大量新元素主打戰技

萬眾期待嘅超級大作《艾爾登法環》(Elden Ring)雖然要去到下年二月先出,不過黎緊將會有測試版本,有申請嘅玩家都有機會玩到。早前 VJGamer 有幸成為被邀請媒體之一進行優先試玩,作為擁有多年魂系經驗嘅玩家,遊玩後發現有大量新元素,而且戰鬥、操作系統有各種改動,就算係老玩家都有需要重新適應,新鮮感十足!

 

 

《艾爾登法環》(Elden Ring)係 FromSoftware 首個採用開放世界嘅魂系遊戲,畫面表現極佳,而美術上同以往作品比較用色更為「正面」,天晴時更會有藍天白雲,相信一眾埋首於「病村」等黑到核爆地區玩家會好唔習慣。與舊有作品不同,遊戲中有日夜、天氣變換系統,暫時未知與解謎或特定怪物出現條件有關。另外,為方便探索,大幅放寬高處落下損血機制,不過太高的話仍然係會死的。

 

 

 

由於使用開放世界,喺洞穴、室內場景以外地方未遇到有轉角偷襲情況,無需持續舉盾前進,較為輕鬆。同時野外場景有大量野生動物(可擊殺)及採集物,有自己一套生態,亦提供無限資源去「製作」物品,以便攻略(製作係今次新元素,購入特定物品後可隨時製作如飛刀、火焰瓶、五色石等道具)。

 

有大量野生動物,有自己一套生態,真係首次咁「生氣勃勃」

由於地圖極大,騎性探索在所難免。喺馬上可以施法、衝刺,不過普攻就要預判,用劍的話都幾難劈中人

 

試玩版初始提供五個職業,如果想玩魔法、信仰的話就要揀定相關職業,因為我哋喺試玩過程直到完結都搵唔到鈴、杖買,即使途中執到奇蹟都無得用。另外有追加新屬性「感應」,解說係「影響觀察力的能力值,也會影響對死亡的抵抗力。此外,也和某種魔法、禱告有密切關係」,而我實試加點時發現只會加少量火、雷抗性,未知真實用途。

 

最下方為新屬性「感應」

 

今集另一主力新元素係召喚靈體為自己作戰,可於商人中購入,需於左方有墓碑符號出現時先可以使用(一般都係打王、強敵時出現)。試玩版中最強力嘅靈體為「狼群」(另外兩款有啲廢),消耗大量 FP 召喚三隻狼喺一定時間內為你而戰,每隻狼有自己血量,速度快攻擊頻率高存在時間耐,而且會令敵人產生小硬直,非常實用。

 

打一群敵人時極之實用

玩物理嘅都可以使用靈體召喚,威力並無分別

 

戰鬥系統主要都係沿用《Dark Souls》系列操作,新加入《隻狼》嘅跑步及跳躍,跳躍中攻擊同時做成大硬直,打王常用。另外,未知是否體驗版未設定好關係,使用魔法時不能以翻滾取消,要完成整個施法動作後先可以翻滾,容錯性及靈活度大減,魔法使用者需注意。

 

魔法不能以翻滾取消,要完成整個施法動作後先可以翻滾,容錯性及靈活度大減

部份王識反射魔法,以往玩純魔嘅玩家可能要學下物魔混合打法(不過大劍近戰魔法就未試過反射)

 

宣傳及影片中並未大幅提及,但極為重要並且係今次作品核心「戰技」。雖然以往《Dark Souls》系列都有類似動作,但威力、實用性等都遠遠不及。以職業「白狼戰鬼」為例,初始武裝混種大劍綁定戰技「落雷」可鎖定遠方敵人雷擊,傷害與重攻擊相約,FP 損耗低,極之實用。

戰技不但實用,變更戰技後更會連令戰法改變。試玩版中擊敗部份頭目會得到「戰灰」,與武器綁定後可獲得新戰技,例如戰技「輝劍圓陣」就係類似「王之財寶」,喺四周召喚五把魔法劍殺敵,與「落雷」用法完全不同,而且綁定不同戰技會改變武器屬性及加成,如混種大劍綁定「輝劍圓陣」後會追加魔攻降低物攻,力量加成亦會變化(類似質變),而戰技可於「營火」切換。

 

 

武器有戰技,盾牌同樣有,以「白狼戰鬼」初始武裝盾牌戰技為「擋格」,使用方法為擋格中敵攻擊打中盾牌時按 R2 / RT,成功的話會施展比平常揮刀速度快嘅重攻,擊中敵人會做成極大硬直,可繞至背後背刺。此戰技雖不耗 FP,但使出時沒有任何無敵時間,如果唔係準確掌握敵人攻擊次數、頻率的話反而會中招,但仍然係極重要必學核心技巧。

 

 

總結:

以魂系死忠黎講,《Elden Ring》不但以另一種方式延續魂系,更加入多種細節及元素,就算老手玩都有極重新鮮感,新手亦可以體驗何謂「宮崎英高的善意」。今次試玩版雖然只有地圖一部份,但地圖已經極大,內容亦好足夠,令人更為期待正式版本,神作無誤。

《Elden Ring》預計於 2022 年 2 月 25 日,對應平台為 Xbox Series X|S、Xbox One、PS5、PS4、PC。

森麻

VJGamer總編,細細個已經蒲機舖,機齡甚深,熱愛電玩文化。

追蹤

Facebook 更多文章