【遊戲新聞】《Elden Ring》全資訊地圖上線 包含道具武器戰技頭目位置

基本上大部份玩家都繼續沉迷喺《Elden Ring》嘅世界,但因為今集使用開放世界,地圖大到嘔難免好多野都搵唔到,所以就有線上互動地圖出現。呢類地圖通常都係有攻略網站或者大量玩家依靠各種社群情報合力完成,最近就有兩款非常好用嘅地圖上線,各有優劣,大家可因應情況使用。

 

 

今次介紹嘅兩款《Elden Ring》線上互動地圖,都有晒全地圖裝備、武器、骨灰、戰技、道具、紅靈、頭目、洞穴等資訊,而且可自由切換各資訊開關(唔係睇到眼盲),兼且有搜尋功能,基本上知道名就搵到。不過由於遊戲內容實在太豐富,所以兩款地圖都會持續更新,但已經非常詳盡,可以安心使用。

第一款係由 MapGenie 製作,佢地可以話係做開放世界線上地圖嘅老手了。優點係介面靚仔簡單易用,讀取速度快兼可以用全螢幕,最正係分類選項過濾得比較細緻,要搵特定野都幾容易,例如「製作筆記」就可以獨立顯示。缺點係每個項目只有簡單描述(絕大多數都係得個名),如果唔係玩英文版的話,下下都要 Copy 返個名 Google 下係乜,唔熟啲道具、裝備等英文名嘅玩家會用得較麻煩。

地圖連結:https://mapgenie.io/elden-ring/maps/the-lands-between

 

第二款地圖係由外國遊戲網站 Fextralife 製作嘅線上地圖,好處係整個地圖每一個項目接近 100% 會連返去佢地自家 Wiki,不但有完整介紹,有時更會有影片連結。缺點係讀取較慢,又無得放大做全螢幕,而且有時仲要 Zoom 近先點到正確位置,用得唔太爽。

地圖連結:https://eldenring.wiki.fextralife.com/Interactive+Map

 

 

當然,雖然有龐大嘅玩家群齊齊搵遊戲中各種秘密,但相信仲有大量野未有玩家發現,所以以上兩款地圖都未係完美,最好係混合使用。幸好兩款地圖都表明會持續更新,未來將會更為完善。至於中文版地圖,現時有款由中國玩家製作嘅地圖,但因為可以自由編輯,基本上呃人多過乜,所以我哋並不推薦,都係乖乖地用返上面兩個啦。

 

回帶相關文章:

【遊戲評測】對新手最友善一集 《Elden Ring》同時亦係最具挑戰性最易棄坑一集

【遊戲介紹】實用技巧及小知識 《Elden Ring》新手老手皆適用無劇透解說

【遊戲新聞】《Elden Ring》玩到有挫敗感?宮崎英高表示:「我很抱歉(笑)」

【遊戲新聞】PS5存檔有機會消失 《Elden Ring》出現大量問題將盡快修復

【遊戲新聞】《艾爾登法環》超多濕淋淋地形:宮崎英高笑言「我真的好愛沼澤」

 

五木

動漫電玩宅,極愛金田一系列,擅長動作及策略遊戲

追蹤

更多文章