【以下文章由讀者 Peter 投稿】《Telling Lies》同《Her Story》一樣，都出自 Sam Barlow 之手，係我地呢個時代難得一見既 FMV（Full Motion Video）遊戲。

FMV 本來係 CD 時代開始時，遊戲界曇花一現既失敗種類（雖然有幾隻係有少少成功），但係將遊戲拘束於「睇片」同「做選擇」，係當時互動性超高既遊戲時代來講，真係冇乜人BUY（當然演員、道具、特效同聲效等等全部都差，亦係重要因素）。係唔知點解近年來呢類遊戲竟然興起返，《Telltales games》、《Until Dawn》等等作品湧現，仲要一片好評，真係令我懷疑人生。

不過《Her Story》既推出，的確改變左成個遊戲種類。演員多才多藝，演出專業，劇情方面則用上前所未見既探索式玩法來推進。以往 FMV 用主線模式開展故事，即使如《The Walking Dead》、《Until Dawn》一流，都冇可能給予玩家充足自由度去做探索。即使係再單線既《Call of Duty》單人模式，如果冇探索收集要素，估計都要被人炮轟，單線推進選擇係FMV 遊戲既死症。

《Her Story》同新作《Telling Lies》則一反傳統，玩家可以在為數不少的影片之中，透過搜尋，搵到好多同主線故事無關既細節。無需要特登比一段文字大家補充資料，更加唔會玩玩下有張相咁同你講發生左咩事，所有野都有演員同劇本為你帶出，無論係幾咁枝節，玩家都可以得到側面既資訊，對故事同角色有更深刻既理解。

我又開始懷念《Her Story》了。《Her Story》既故事比較集中於女主角，但係根據玩家搜尋既方式或者關注到既重點，會展示出唔同既道路。以估計玩家冇可能一周目睇哂所有片段來推測，睇到唔同道路既影片既玩家會傾向相信佢果條路就係正統既結局。亦即係用同一個人，同一個故事，可以講到三個結局出來。而且《Her Story》既玩家設定上有必需要知道故事走向既原因，係最後披露既時候呢個原因亦令玩家印象深刻。

去到《Telling Lies》時，玩到差不多一半，果種追下一段片既成癮程度已經不及《Her Story》。有人話係劇情問題，或者係角色問題，其實都有幾大既影響，但始終不及遊戲設計既問題嚴重。

原以為幾個角色之間除左男主角向其他人「Tell Lies」重之外，佢地幾個人都會互相講大話，點知最後大家既關係根本微乎其微。再者，所謂既三個結局只係測試緊大家最想追看邊一條線既故事比較多，同《Her Story》心理上干擾玩家對故事既理解，成個手法上差好遠。最大鑊係，睇哂成個故事，都睇唔到玩家扮演既角色同幾位主角同埋個故事本身有啲咩關係，咁佢點解要咁麻煩走去睇片呢？

最終評分︰75
除左演員演出、音效、特效同故事複雜程度比前作有更多預算可以改善之外，遊戲既設計本質反而係退步左。

VJGamer 歡迎讀者投稿 – 如蒙投稿，請將文稿、筆名、作者簡介及聯絡電話，電郵至 [email protected]。