【遊戲介紹】每死一次變老一歲 《Chronos: Before the Ashes》隨死亡次數改變玩法的動作遊戲

之前我地介紹過,由 Gunfire Games 開發嘅《Chronos: Before the Ashes》(時間:在塵之前)日前正式出街,不過因為唔係咩大作,所以香港都係無人會提的。雖然唔係大作,但佢嘅質素絕對唔差,而且仲加入非常獨特嘅元素 – 遊戲中玩家每死亡一次,都會老一歲!

 

 

《Chronos: Before the Ashes》其實係之前我地力推嘅揸槍版黑暗靈魂 《Remnant: From the Ashes》前傳,雖然同樣係第三身動作角色扮演遊戲,但係就取消咗射擊元素,改為著重於近距離戰鬥,亦因為呢個改變令遊戲整體感覺更有「Dark Souls」味。故事講述世界末日後,世界被神秘迷宮出黎嘅怪物主宰,為咗結束呢個狀況,主角決定進入呢個一年只會打開一次嘅迷宮大門,對抗邪惡力量拯救家園。

 

 

遊戲基本操不外乎都係輕、重攻擊、魔法、閃避、擋格,主要玩法都係根據怪物攻擊方式,再做出相應嘅對策,以及各式各樣嘅解謎。《Chronos: Before the Ashes》特別之處係故事設定咗迷宮大門一年只會打開一次,所以角色一但死亡,就會隨之變老一歲(因為要等一年先入得嘛)。年齡變化不但影響外觀,仲會改變玩家嘅能力。簡單講就係越年輕力量及敏捷度就會越高,而隨著年齡增長,角色將會變得有智慧並擅長魔法。另外,玩家生命週期會係 20 – 80 歲,年齡每增長 10年就會解鎖一次特殊能力,而特殊會有三個分支,每個角色只能學習一種特殊能力,加上升級角色配點,將會出現多種育成方法。

 

 

《Chronos: Before the Ashes》已於 12 月 1 日正式上市,對應平台為 Xbox One / PS 4 / Nintendo Switch / PC Steam、EPIC、Microsoft Store。

 

回帶相關文章:

【遊戲新聞】揸槍版黑暗靈魂 《Remnant》多人連機鬥快死

【遊戲介紹】死又有咩可怕?《Chronos: Before the Ashes》死一次強一次

 

五木

五木 動漫電玩宅,極愛金田一系列,擅長動作及策略遊戲

追蹤

更多文章