【遊戲攻略】《Elden Ring》最多新手問嘅問題 玩乜職要升級要點乜一文解答

《Elden Ring》雖然就嚟出咗一星期,但係仲有極大量玩家徘徊喺大樹守衛、惡兆等初始地區,而且依然有為數不少嘅新手仲係有「玩乜職好」、「升級點乜好」、「有乜武器勁」等問題,所以特別寫一篇解答大家。

 

 

想知道「玩乜職好」,就要先理解「魂系列」遊戲。喺「魂系列」遊戲其實一直都無職業之分(就算《Elden Ring》都一樣),有嘅只係出生時等級同初始裝備嘅分別,而任何出身嘅初始裝備都可以喺遊戲中買到,你鍾意用囚犯起手,著全套武士裝放魔法都完全無問題的。

 

一無所有出身,著全套武士裝再拎法杖係完全無問題的,所有初始裝備喺遊戲中都買到

 

魂系遊戲有特定連線機制,根據過往作品,如果召喚雙方等級差太多就會睇唔到對方召喚印。為咗可以同大多數人連線,一般玩家都會將等級升到 110 – 120 級就停(有固定隊友可無視),亦因為呢個原因可升級點數變得有限,所以就會有將點數以某一屬性為主嘅加點法,例如信仰流、咒術流等等玩法。呢個就係點解你聽魂系老手講自己玩乜時,會話自己係力體 Build、出血 Build 嘅原因。

 

試過同朋友等級差太多,見唔到對方召喚印,除非有固定隊友一齊升,否則的話現階段不建議無上限地升

 

理解咩係魂系之後,自然明白揀咩職係廢話黎,反正啲裝咩出身都用到,但係加點則有另一套學問。魂系遊戲傷害公式複雜,並無絕對嘅「強」,有嘅只係唔同嘅玩法同武器、術嘅固有動作。喺《Elden Ring》由於中後期小卒攻擊力強到嚇死人,所以一律建議最少點 20 點生命值加大容錯度(可視自身需求增加,個人覺得 30 點最安全),耐力亦建議點 15-20 點,不但可拎較重裝備,精力更長代表可做更多動作、擋更多攻擊。

 

今集敵人攻擊力可怕,唔點返少少血真係會比人秒

 

升完血耐之後,就要考慮角色之後成長走向,一般黎講有兩種做法。第一種就係跟需求去加點,當你搵到一把你覺得好啱用嘅武器、法術之後,按佢面板需求去加點數。以熱門武器「夜與火之劍」為例,需求力12 靈巧12 智力24 信仰24,咁就按佢面板去加點。點夠之後,再以自己角色成長方向去加點,例如主玩法術嘅就加多啲智力加攻同加集中力加 FP,亦可以加靈巧增加施法速度;主玩近戰嘅就可以加多啲生命撐血等等,玩法自由。

 

 

另一種就係追求最大傷害,每一把武器都有項叫「能力加成」嘅數值,呢個數值即係代表角色本身能力補正嘅攻擊力,簡單講就係該點數越高能力補正越高。以「磒石杖」為例,智力補正為 S,但用於弱智角色身上魔法加成只有 60;而觀星者初始法杖「輝石杖」雖然智力補正只有 B,但魔法加成已經有 109,由此可見當角色能力值越低時,武器自身能力比起角色能力更為重要。亦即係當你想玩傷害最大化時,應該搵一把對該能力直補正高嘅武器,又或者使用戰灰將武器質變為較高能力補正,例如將軍王直劍質變做「厚重君王直劍」力氣補正就會由 D 變為 C。

 

並不是補正越高越強,都要睇返自身屬性點分配

 

至「有乜武器勁」呢個問題,除咗單睇數值、能力補正之外,最重要都係該把武器嘅固有動作、重量、揮動動作、戰技等等係咪啱你口味(越重嘅武器越易打「窒」人),特別係勁呢樣野人人準則唔同,有人覺得扣得多等於勁,有人覺每刀都可以打停人就叫勁,有人覺得打到中毒出血就好勁。好似早期得到嘅君王軍大劍,重量同揮動動作都好啱我口味,所以我一直用到中期,就覺得好唔錯。亦有人熱愛闊劍,貪佢戰技好用,成件事好個人,建議大家拎到新武器都裝下,試下係咪啱自己玩法先算,同埋記住永遠無「最勁」,只有不同嘅玩法。

 

君王軍大劍真心幾好用,我都係用佢前中期打天下

 

基本上,了解魂系列遊戲嘅基本後,上面嘅問題你會「笑下就算」。魂遊戲博大精深,《Elden Ring》又啱啱推出,加上新屬性「感應」用途不明,仲有大量玩法未被發掘,與其實踐人地口中所謂嘅「勁」,不如探索下啱自己玩法所得來嘅「勁」,絕對有趣得多。

 

最緊要啱自己,人地話嘅「勁」唔代表啱你

 

回帶相關文章:

【遊戲新聞】《Elden Ring》全資訊地圖上線 包含道具武器戰技頭目位置

【遊戲評測】對新手最友善一集 《Elden Ring》同時亦係最具挑戰性最易棄坑一集

【遊戲介紹】實用技巧及小知識 《Elden Ring》新手老手皆適用無劇透解說

【遊戲新聞】《Elden Ring》玩到有挫敗感?宮崎英高表示:「我很抱歉(笑)」

【遊戲新聞】PS5存檔有機會消失 《Elden Ring》出現大量問題將盡快修復

【遊戲新聞】《艾爾登法環》超多濕淋淋地形:宮崎英高笑言「我真的好愛沼澤」

 

五木

動漫電玩宅,極愛金田一系列,擅長動作及策略遊戲

追蹤

更多文章