香港有個幾出名嘅都市傳說，就係十隻高達 Game 九隻伏，但凡事總有例外。我哋日前就優先試玩咗下個月推出嘅《SD GUNDAM 激鬥同盟》（SD GUNDAM BATTLE ALLIANCE），意外地整體都幾唔錯，值得期待。（懶睇字嘅可以一野拉到落底睇片）

《SD GUNDAM 激鬥同盟》由開發，係一款動作遊戲，採用第三身視點。故事就類似《G Generation》咁，同事會有多個世代嘅機種出現。喺本作叫做「破史現象」，但因為係時空出現混亂所致，令到歷史出現偏差。例如喺 0079 入面本應係由駕駛老虎嘅賴巴同阿寶對戰，發生「破史現象」就變成由三日月駕駛巴巴托斯與阿寶對戰。劇情對白亦會圍繞住呢個現象去描寫，當中唔少廢話都幾得意有趣。

遊戲以「破史現象」去解釋其他世代機種亂入，中間會有劇情穿插，對白都算有心機度過。有趣嘅係劇情中遇到嘅亂入敵人都有機會加入己方陣型，每次擊破敵機都有機會掉落相關設計圖，儲夠就可以解鎖使用相關機體，以及得到該機機師加入。當得到該機體及機師後仲可以更換機體，即係阿寶揸巴巴托斯都得，同 G Gen 一樣。

主菜自然係戰鬥系統，基本動作有跳、衝刺、閃避、擋格，攻擊就分為格鬥、特殊格鬥、主射擊以及二個副武器，但係測試中大部分射擊類武器都無法打出硬直，略嫌美中不足。加上面對 Boss 時要打爆對方裝甲先可以進行連招，但係 Boss 回裝甲速度遠高於你嘅造成嘅傷害，除非幾人集火否則單人都幾難打爆，設定有點出錯。

要單人打爆 Boss 裝甲值其實係有方法，不過相對技術要求比較高，依靠嘅就係「Just Guard」。只要喺敵方攻擊臨打中時進行擋格，成功的話就會發動精準防禦，此時發動格鬥攻擊即可一擊打爆對方裝甲值進行連招，有興趣嘅可以睇文末實機試玩片段。

機體類型分為全能、近戰、射擊三種。全能型可用閃避強制取消動作硬直、近戰則較難被人打至後仰。因為有此特性，施展連招時可用格鬥 >閃避>格鬥 Loop，更高階可用格鬥 >閃避>用格鬥 >浮空特殊格鬥>跳>空中格鬥 >轟飛，爽度十足。

暫時已知收錄作品：

機動戰士高達
機動戰士高達0080 口袋中的戰爭
機動戰士高達 第08MS小隊
機動戰士高達 雷霆宙域戰線
機動戰士高達0083 星塵作戰回憶錄
機動戰士Z高達
機動戰士ZZ高達
機動戰士高達 馬沙的反擊
機動戰士高達 馬沙的反擊 貝積嘉之子嗣
機動戰士高達UC
機動戰士高達F91
機動戰士海盜高達
機動戰士V高達
機動武鬥傳G高達
新機動戰記高達W
機動新世紀高達X
∀高達
機動戰士高達SEED
機動戰士高達SEED ASTRAY
機動戰士SEED VS ASTRAY
機動戰士高達SEED DESTINY
機動戰士高達00
劇場版 機動戰士高達00 -A wakening of the Trailblazer-
Reconguista in G
機動戰士高達 鐵血的孤兒
武者・騎士・指揮官 SD高達緊急出擊

官方指每部作品最少都會有一部以上機體登場。預計於 8 月 25 日推出，對應平台為 Xbox Series X|S、Xbox One、PS5、PS4、Nintendo Switch 及 PC Steam，支援繁體中文。